गलकोट । स्थानीय तहको निर्वाचन नजिकिएसँगै उम्मेदवारहरुले चुनावी प्रचारप्रसारलाई तीव्र बनाएका छन् । तर चुनाव प्रचारप्रसारका क्रममा उनीहरुले आचारसंहितालाई भने ख्याल नगरेको पाइएको छ ।
मतदातालाई आकर्षित गर्नका लागि उम्मेदवारहरुले चर्को आवाजमा माइक बजाउने, प्रचारप्रसारमा बालबालिकालाई प्रयोग गर्ने र विद्यालयलगायतका स्थानमा चुनावीसभा गरेको पाइएको छ । यद्यपि मुख्य निर्वाचन अधिकृत कार्यालय बागलुङमा भने लिखित उजुरी भने परेका छैनन् । तर दैनिकजसो आचारसंहिता उल्लङ्घन गरेको मौखिक उजुरी आउने गरेको मुख्य निर्वाचन अधिकृत वासुदेव न्यौपानेले जानकारी दिनुभयो ।
दलहरुलाई आफूहरुले आचारसंहिताका विषयमा पटकपटक ध्यानाकर्षण गराएको भन्दै त्यसतर्फ निर्वाचन कार्यालय गम्भीर भएको बताउनुभयो । सहरभन्दा गाउँका डाँडाकाँडामा प्रचारात्मक सामग्री तथा चुनावी गीत गुञ्जिरहेको छ । बजार क्षेत्रभर रातको १० बजेसम्म चर्को आवाजमा चुनावी नारा समेटिएको गीत घन्काउने गर्दा नागरिकलाई सास्ती भएको निर्वाचन कार्यालयमा गुनासो टिपाउने गरेका छन् ।
सामुदायिक विद्यालय, स्वास्थ्यचौकीलगायतका स्थानमा पनि आमसभा गरेको नेता तथा कार्यकर्ताले सामाजिक सञ्जालमा फोटो पोस्ट गर्ने गरेका छन् । तर सम्बन्धित निकायले भने यसतर्फ खासै ध्यान नदिँदा निर्वाचन आचारसंहिता उल्लङ्घनका घटना बढेर जाने देखिएको छ । आचारसंहितामा सार्वजनिकस्थलमा चुनावी प्रचार तथा आमसभा नगर्ने भनेको भए पनि दलले अटेरी गर्दै आएका छन् । बागलुङमा धेरै आचारसंहिता उल्लङ्घन गर्नेमा गठबन्ध र एमाले अगाडि छ । गठबन्धनले गाउँगाउँमा बाजागाजासहित चुनावीसभा गर्दै आएको छ भने एमाले र राप्रपाले बाइक¥याली गरेर मतदाता आकर्षित गराइ राखेको पाइएको छ ।
केही दिन अगाडि काठेखोला गाउँपालिका–३ धम्जाको एक विद्यालयमा गठबन्धन र नेकपा ९एमाल०ले सयौँको सङ्ख्यामा मान्छे जम्मा गरेर चुनावीसभा गरेको थियो । विद्यालयमा आमसभा गर्न नपाइने भए पनि दलले स्थान अभाव भएको भन्दै विद्यालयमा आमसभा गर्दै आएका छन् । निर्वाचन आयोगले जारी गरेको निर्वाचन आचारसंहितमा जुलुस, आमसभा, कोणसभा, बैठक एवं भेला गर्दा सभ्य र अनुशासित तरिकाले गर्ने, भेला गर्दा स्थानीय प्रशासनको अनुमति लिएर मात्रै गर्ने भने पनि यहाँका कुनै पनि दलले त्यसको पालना गरेका छैनन् ।
आमसभा, कोणसभा, बैठक एवं भेला गर्नु ७२ घण्टा अगाडि नै स्थानीय प्रशासन र प्रहरीलाई मिति, समय र स्थानको जानकारी गराउने भने पनि अहिलेसम्म कुनै पनि दलले प्रहरी प्रशासनलाई जानकारी गराएको पाइएको छैन । प्रहरी प्रशासनलाई कुन दलले कहाँ आमसभा गर्दैछ भन्नेसमेत जानकारी हुँदैन । जिल्लामा ठूला नेता आउँदा जानकारी गराए पनि अहिले दलले गाउँगाउँमा आमसभा आफ्नै तरिकाले गरेको जिल्ला प्रहरी कार्यालय बागलुङका सूचना अधिकारी तथा प्रहरी नायब उपरीक्षक इन्द्रबहादुर रानाले बताउनुभयो ।
निर्वाचन आयोगले चुनावी प्रचारप्रसारमा १८ वर्ष मुनिका बालबालिकालाई प्रयोग नगर्ने भनेको भए पनि यसको पालना हुन सकिरहेको छैन । आचारसंहिता उल्लङ्घन गरी चुनाव प्रचारप्रसार गर्दा समस्या भएको स्थानीयवासीले गुनासो गरेका छन् । रासस
