काठमाडौं । गृहमन्त्री बालकृष्ण खाँणले नागरिकको जीवन रक्षा गर्ने कामलाई सरकारले पहिलो प्राथमिकतामा राखेको बताउनु भएको छ ।
गृहमन्त्री खाँणले बुधबार ठमेल पर्यटन व्यवसायीहरुसँगको छलफलमा कोभिड–१९ को संक्रमणले मृत्यु हुनु भएन भनेर सरकारले खोपलगायतका व्यवस्थालाई चुस्त बनाएको पनि स्पष्ट पार्नु भयो । उहाँले पर्यटन व्यवसायलाई सहज ढंगले संचालन गर्ने वातावरण बनाउन सरकारले पर्यटन व्यवसायीहरुलाई कोभिडविरुद्धको खोपको आवश्यक व्यवस्था मिलाउन सम्बन्धित निकायलाई निर्देशन दिएको पनि स्मरण गराउनु भयो । उहाँले भन्नु भयो, ‘कुनै पनि नेपालीको अकालमा मृत्यु हुनु भएन । अकाल मृत्युबाट नागरिकलाई कसरी रक्षा गर्ने अहिलेको सरकारको सबैभन्दा मूल फोकस नै यही हो । कोभिड– १९ को संक्रमणले पनि कसैले मृत्यु हुनु भएन । दूर्घटनामा पनि कसैको मृत्यु हुनु भएन । एक आपसमा हानहानले पनि कसैको मृत्यु हुनु भएन । कुनै पनि कारणले नागरिकको अकालमा मृत्यु हुन्छ भने हामी सबैलाई त्यसको पीडा हुन्छ ।’
गृहमन्त्री खाँणले ठमेललगायतका पर्यटन व्यवसायीहरुको व्यवसाय सहज ढंगले संचालनका लागि सरकारले गम्भिरतापूर्वक छलफल गरिरहेको पनि बताउनु भयो । छलफलमा पर्यटन व्यवसायीहरुले पर्यटन व्यवसाय पूर्ण रुपमा संचालनका लागि आवश्यक व्यवस्था मिलाउन गृहमन्त्री खाँणको ध्यानाकर्षण गराएका थिए । उनीहरुले कोभिड १९ का थला परेको पर्यटन व्यवसायलाई माथि उठाउन सरकारले आवश्यक वातावरण बनाउन ढिलाई गर्न नहुनेमा पनि जोड दिएका थिए ।
