काठमाडौं । सरकारले प्रमुख प्रतिपक्षी नेकपा एमाले वार्ता र संवादबाट भाग्न खोजेको बताएको छ । २३ भदौमा सुरु भएको संसद अधिवेशनमा एमालेले नाराबाजी गर्दै आएपछि सो संसदको अवरोध हटाउने विषयमा छलफल गर्न प्रधानमन्त्री शेरबहादुर देउवाले आज संवाद र छलफलका लागि सर्वदलीय बैठक बोलाएको थियो ।
तर प्रतिपक्षी एमालेले ब्रैठकलाई बहिष्कार गर्दै अनुपस्थित भए । यता सरकारका प्रवक्ता एवम् कानूनमन्त्री ज्ञानेन्द्रबहादुर कार्कीले सञ्चारकर्मीहरुसंग कुरा गर्दै संसद अवरुद्ध गर्ने दल नै सर्वदलीय बैठकमा नआएको भन्दै उहाँहरुवार्ता र संवादबाट पर भाग्न खोजेको देखिएको बताए ।
पछिल्लो समय आफूले कारबाही गरेका १४ सांसदलाई पदमुक्त नगरेर दल विभाजनमा सभामुख अग्निप्रसाद सापकोटादले सहयोग गरेको भन्दै एमालेले प्रश्न उठाउँदै आएको छ ।
आजको सर्वदलीय बैठकमा नेपाली कांग्रेसका तर्फबाट प्रधामन्त्री एवं पार्टी सभापति देउवा, कानुन, न्याय तथा संसदीय मामिलामन्त्री ज्ञानेन्द्रबहादुर कार्की, नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ र नेता नारायणकाजी श्रेष्ठ, नेकपा (एकीकृत समाजवादी)का महासचिव बेदुराम भुसाल र नेता राजेन्द्र पाण्डे, लोकतान्त्रिक समाजवादी पार्टी नेपालका महन्थ ठाकुर र राजेन्द्र महतो, जनता समाजवादी पार्टी नेपालका नेता राजेन्द्र श्रेष्ठ, नेपाल मजदुर किसान पार्टीका नेता प्रेम सुवाल, राष्ट्रिय जनमोर्चाका उपाध्यक्ष दुर्गा पौडेललगायतको सहभागी रहेको प्रधानमन्त्रीका संसदीय दलका निजी सचिव केशवराज जोशीले जानकारी दिए ।
