एजेसी । रहस्यले भरिएको अन्तरिक्षमा हरेक दिन कुनै न कुनै नयाँ घटना भइरहन्छ । यीमध्ये धेरै घटना यस्ता छन् जुन पृथ्वीका लागि खतरनाक छ ।

अब फेरि एक पटक अन्तरिक्षमा यस्तो घटना भएको छ, जसका कारण पृथ्वी खतरामा परेको छ । यो खतराको कारण इतिहासको सबैभन्दा ठूलो पुच्छ्रेतारा अर्थात् धूम्रकेतु हो, जुन तीव्र गतिमा पृथ्वीतर्फ बढिरहेको छ। अमेरिकी अन्तरिक्ष एजेन्सी नासाले यो घटनाको निगरानी गरिरहेको छ । यो धूम्रकेतु ३५ हजार ४०५ किलोमिटर प्रतिघण्टाको गतिमा पृथ्वीतर्फ सरिरहेको छ ।

यो धूम्रकेतुको तौल ५०० ट्रिलियन टन छ जसको चौडाइ १२८ किलोमिटर छ । यो धूमकेतु अन्य धूम्रकेतु भन्दा ५० गुणा ठूलो रहेको बताइएको छ । यसैबीच, सबैभन्दा ठूलो प्रश्न यो हो कि इतिहासको सबैभन्दा ठूलो धूम्रकेतुबाट पृथ्वीमा कुनै खतरा छ ?

अमेरिकी अन्तरिक्ष एजेन्सी नासाले धूम्रकेतु पृथ्वीतर्फ तीव्र गतिमा आउँदा डराउनु नपर्ने बताउँदै धूमकेतु सूर्यबाट करिब १ अर्ब ६० करोड किलोमिटरभन्दा नजिक नआउने जनाएको छ ।

एक मिडिया रिपोर्टका अनुसार यस धूम्रकेतुको नाम C/2014 UN271 हो जुन पहिलो पटक नोभेम्बर २०१० मा देखिएको थियो जुन त्यसबेला सूर्यबाट ४.८२ बिलियन किलोमिटर टाढा थियो । त्यतिबेला यो धूम्रकेतु सौर्यमण्डलको छेउमा रहेको आफ्नो केन्द्रतर्फ सरिरहेको थियो ।

रिपोर्ट अनुसार C/2014 UN271 को द्रव्यमान अन्य धूम्रकेतुहरू भन्दा १० लाख गुणा ठूलो छ । यो सामान्यतया सूर्यको नजिक देखिन्छ । वैज्ञानिकहरूले यसलाई पहिलो पटक देखेसँगै निगरानीमा राखिरहेका छन् ।

यस धूम्रकेतुको अनुगमन गर्ने वैज्ञानिकहरूले सन् २०३१ मा यसको यात्रा पृथ्वीबाट शनिको दूरीमा समाप्त हुने विश्वास गरेका छन् । हबल स्पेस टेलिस्कोपबाट खिचिएका तस्बिरहरूबाट यो विशाल धूम्रकेतुको आकार पत्ता लागेको हो ।