झापा । अचानक आएको हावाहुरी र असिनापानीले झापा र धनकुटामा करोडौको क्षति पुर्याएको छ । आइतबार दिउँसो एक्कसी हावाहुरी सहित आएको असिनापानीले ठूलो क्षति गरेको हो । हावाहुरीबाट दर्जनौँ घर भत्किएका छन् । करोडौको अन्नबाली नष्ट भएको छ । फलफूल र तरकारी सखाप भएको छ ।
हावाहुरीसँगै काँडा सहितका ठूल्ठूला असिना र पानी पार्यो, एकैछिनमा सबै कुरा सोत्तर पार्यो । किसानहरुले गुनासो गरे ।
दिउँसो १ बजेतिर करिब आधा घण्टाको समयमा यति ठूलो विनास भएको हो । झापाको मध्यभाग भएर मडारिएको हावाहुरी र असिनापानीले ठूलो क्षति गरेको छ । राजमार्ग वरपर र उत्तरी क्षेत्रमा पानी परे पनि खास क्षति भएको छैन । दमक, गौरादह, शिवसताक्षी, भद्रपुर नगरपालिकाका केही भाग तथा कमल, बाह्रदशी, झापा, गौरीगन्ज, कचनकवल गाउँपालिकाका आंशिक क्षेत्रमा क्षति पुगेको छ । असिना र हावाहुरीले रुख झार्दा भुइँमा बिस्कुन लगाको छ ।
हावाहुरी, असिनापानीले मकै, गहुँ, सूर्यमुखीलगायत अन्न तथा तेलहन नष्ट परेको छ । टमाटरलगायत तरकारी, कोला, आँप, लिचीलगायत फलफूल नाश गरेको छ । हावाहुरी र असिनापानीको क्षतिको विवरण सङ्कलन गर्न थालिएको शिवसताक्षी नगरपालिका–६ का वडाध्यक्ष मनोज खुलाल कार्कीले बताए । हावाहुरी र असिनापानीले झापाको मध्य भागमा ठूलो क्षति भएको जनाइएको छ । तर, अहिलेसम्म क्षतिको विवरण आइसकेको छैन । गत असोजमा आएको हावाहुरीले धान खेतीमा पुर्याएको नोक्सानको क्षतिपूर्ति नपाएका किसान हावाहुरी र असिनापानीले थप मर्कामा परेका छन् । अन्नबाली मात्रै नोक्सान भएको छैन कतिपय त विस्थापित नै भएका छन् ।
उता धनकुटामा हावाहुरीले ५ घरधुरीमा क्षति पुर्याएको छ । जिल्ला प्रशासन कार्यालय धनकुटाका अनुसार आइतबार दिउँसो आएको हावाहुरीले धनकुटा नगरपालिका ८ सान्ताङ र चुलिवनमा ५ घरमा क्षति पुगेको छ । हावाहुरीबाट ५ घर पूर्णरुपमा क्षति भएका छन् ।
धनकुटामा क्षतिको विवरण आइसकेकोले राहत र पूर्नस्थापनाका काममा जुट्न सबै सरोकारवाला निकायलाई निर्देशन दिइसकिएको धनकुटाका प्रमुख जिल्ला अधिकारी युवराज कट्टेलेले जानकारी दिए । धनकुटामा हावाहुरीका कारण मानवीय क्षति भने भएको छैन ।
हावा हुरीका कारण १० लाख बराबरको क्षति भएको विवरण आएको धनकुटाका प्रहरी निरीक्षक काशीनाथ रेग्मीले जानकारी दिए ।
