काठमाडौं । खुमलटार युथ क्लब सहिद स्मारक ‘ए’ डिभिजन लिग फुटबलमा बढुवा भएको छ । आइतबार ‘बी’ डिभिजन लिगको आफ्नो अन्तिम खेलमा सामाजिक युथ क्लबलाई २–१ गोल अन्तरले हराउँदै खुमलटार शीर्ष डिभिजनमा उक्लिएको हो ।
सातदोबाटोस्थित एन्फा कम्प्लेक्समा सम्पन्न खेलमा सबिन केसीले १४ औं मिनेटमा गोल गर्दै खुमलटारलाई सुरुवाती अग्रता दिलाएका थिए । तर, खेलको ५७ औं मिनेटमा सुरेश खत्रीले गोल गर्दै सामाजिकलाई १–१ गोलको बराबरीमा ल्याए ।
यता, खेलको इन्जुरी समयमा सामाजिकका विकास लिम्बुले आत्मघाती गोल गरेपछि खुमलटार २–१ गोलले विजयी बन्यो । जितसँगै खुमलटार ‘बी’ लिगको दोस्रो स्थानमा रहदै ए डिभिजनमा उक्लिएको हो ।
२०६१ सालमा स्थापना भएको खुमलटारले पहिलो पटक ए डिभिजन लिग खेल्न लागेको हो । खुमलटारले १३ खेलमा २२ अंक जोड्यो । समान २२ अंक रहेको रानीपोखरी कर्नर टिम (आरसिटी)भन्दा खुमलटार हेड टु हेडमा अघि रह्यो ।
बी डिभिजन लिग च्याम्पियन भने चर्च ब्वाइज युनाईटेड बन्यो । खुमलटारसँग पराजित सामाजिक भने रेलिगेसनमा परेको छ । यसअघि झम्सिखेल युथ क्लब रेलिगेसनमा परिसकेको छ ।
