पोखरा । गण्डकी प्रदेश सरकारका प्रवक्ता कुमार खड्काले युवा तथा खेलकुद मन्त्री राजिव गुरुङ (दीपक मनाङे) ले कर्मचारीमाथि हातपात गरेको भन्ने आधिकारिक जानकारी आफूले नपाएको बताउनु भएको छ ।
मंगलबार (हिजो) अपरान्ह मन्त्री गुरुङले उहाँकै मन्त्रालयका सूचना अधिकारी प्रकाश ओझामाथि हातपात गरेको समाचार बाहिरिएपछि उहाँले सञ्चारकर्मीसँग संक्षिप्त कुरा गर्दै त्यसको आधिकारिक जानकारी आफूले नपाएको बताउनु भएको हो । प्रदेश सरकार भौतिक पूर्वाधार, सहरी विकास तथा यातायात व्यवस्थामन्त्रीसमेत रहनु भएका प्रवक्ता खड्काले त्यसबारे मुख्यमन्त्री कार्यालयका प्रमुख सचिव रविलाल पन्थसँग बुझ्दा सो जानकारी आएको र मुख्यमन्त्रीले मन्त्री गुरुङ र कर्मचारीसँग छलफल गरी आवश्यक निर्णय लिने भन्नु भएको बताउनु भयो । सो जानकारी आउनेवित्तिकै आफूले मिडियामार्फत् नै त्यसलाई सार्वजनिक गर्ने प्रतिवद्धता प्रवक्ता खड्काको थियो ।
उहाँले भन्नु भयो, ‘मैले चाँही मिडियामार्फत नै यो जानकारी पाएको हुँ । आधिकारि जानकारी म कहाँ आईपुगेको छैन । मिडियाकै जानकारीलाई आधार मानेर मैले प्रमुख सचिवज्यूसँग यो बारेमा जानकारी छ कि ? भनेर सोधेको थिए । उहाँले यो बारेमा जानकारी मुख्यमन्त्री कार्यालयको आएको र मुख्यमन्त्रीज्यू बाग्लुङ हुनु भएकाले फर्केर आएपछि माननीय खेलकुदमन्त्री र कर्मचारीसँग सोधेर यो बारेमा एउटा निर्णय लिनुहुन्छ भनेको कुरा जानकारुी भएको हुनाले उहाँले जे निर्णय लिनुहुन्छ । म सरकारको प्रवक्ता भएको नाताले मिडियामार्फत् नै जानकारी गराउने प्रतिवद्धता व्यक्त गर्दछ ।’
प्रवक्ता खड्काले मुख्यमन्त्री कार्यालयको आधिकारिक निर्णय आउनेवित्तिकै तत्काल सो बारे मिडियामार्फत् नै जानकारी गराउने पनि बताउनु भयो ।
