काठमाडौँ । संस्कृति, पर्यटन तथा नागरिक उड्डयनमन्त्री प्रेमबहादुर आले तथा कुँवेत स्थित टिभिएस ट्राभल्स एण्ड कार्गोका जनरल मेनेर फातिमा सेरीफबीच आज मन्त्रालयमा भेटवार्ता भएको छ । भेटवार्ताका क्रममा जनरल मेनेजर सेरीफले नेपालमा पर्यटन प्रबद्धन, प्रचार प्रसार तथा कुँवेतका पर्यटकहरु भित्रयाउनका लागि आफुले सहयोग गर्ने जानकारी दिनुभयो ।
नेपालको पर्यटन प्रबर्द्धन तथा पर्यटकीय क्षेत्रको प्रचार प्रसारमा थप विकासका लागि आफ्ना तर्फबाट गर्न सकिने काम गर्ने समेत जनरल मेनेजर सेरीफले मन्त्री आलेलाई जानकारी दिनु भएको थियो । उक्त भेटका क्रममा मन्त्री आलेले कुँवेतका पर्यटकहरु नेपालमा आउदा यहाँका पर्यटकीय क्षेत्रमा राम्रो प्रभाव पर्ने र यहाँका लुम्बिनी, पोखरा लगायतका क्षेत्रमा अवलोकन भ्रमण गर्न आग्रह गर्नुभयो । मन्त्री आलेले भन्नुभयो, “हामी नेपालको दोस्रो ठूलो अन्तर्राष्ट्रिय विमानस्थल भैरहवालाई आगामी जेठ २ गतेदेखि व्यावसायीक अन्तर्राष्ट्रिय उडान सुरु गर्दैछौँ, त्यसपछि लगत्तै पोखरामा उडान गर्छौँ पर्यटकहरुलाई सहज हुने छ ।”
सोही छलफलका क्रममा मन्त्री आलेले अहिले नेपालमा कोरोना सङ्क्रमण दर करिब करिब अन्त भइसकेकाले अब जुनसुक्कै देशका पर्यटकहरु नेपाल भ्रमणका लागि आउँदा कुनै समस्या नरहेको जानकारी गराउनुभयो । कोरोना सङ्क्रमणको अन्तसँगै अहिले नेपालको पर्यटन क्षेत्र केही माथी उठ्न लागेकाले नेपालमा पर्यटकहरु आउँदा यहाँका पर्यटकीय क्षेत्र भ्रमण गर्नमा सहज भएको मन्त्री आलेले बताउनुभयो । उहाँले भन्नुभयो, “कोरोना सङ्क्रमण दर घट्दै गएको छ, पर्यटकहरुलाई यहाँका पर्यटकीय क्षेत्रमा भ्रमण गर्न अहिले निकै सहज भएको छ ।”
–विमलबहादुर विष्ट/रासस
