काठमाडौं । काठमाडौं किङ्स–११ ले चौंथो संस्करणको एभरेष्ट प्रिमियर लिग (ईपीएल) टी–ट्वान्टी क्रिकेटको प्ले अफमा स्थान बनाएको छ ।
कीर्तिपुरको त्रिवि क्रिकेट मैदानमा मंगलबार भैरहवा ग्लाडीयटर्सविरुद्धको खेल स्थगित हुन पुगेपछि एक अंक प्राप्त गर्दै काठमाडौं प्ले अफमा पुग्न सफल भएको हो ।
सोमबार परेको वर्षाले मैदान भिजेको कारण खेल स्थगित भएपछि काठमाडौं र भैरहवाले एक एक अंक बाडे ।
भैरहवा र काठमाडौंबीचको खेल टस समेत नभई स्थगित भएको थियो । काठमाडौं चौंथो स्थानमा रहदै प्ले अफमा पुगेको हो । काठमाडौंले ५ खेलमा ३ अंक जोड्यो ।
ललितपुर प्याट्रीयट्ससँग समान ३ अंक जोडेपनि काठमाडौंले नेट रन रेटको आधारमा प्लेअफमा स्थान बनायो । यता साविक विजेता ललितपुर भने लिग चरणबाटै बाहिरिएको छ ।
भैरहवा ७ अंक जोडेर दोस्रो स्थानमा रहदै क्वालिफायरमा पुगेको छ । अब चितवन टाइगर्स र भैरहवाले पहिलो क्वालिफायर खेल खेल्नेछ । काठमाडौंले पोखरा राइनोजसँग इलिमिनेटर खेल खेल्नेछ ।
पहिलो क्वालिफायरको विजेता सिधै फाइनलमा पुग्नेछ भने पराजित हुने टिमले फाइनल प्रवेशका लागि पुनः इलिमिनेटरको विजेतासँग खेल्नेछ।
