काठमाडौं । नेकपा एमाले निकट भातृ संगठन अखिल नेपाल राष्ट्रिय स्वतन्त्र विद्यार्थी युनियन(अनेरास्ववियु)को केन्द्रीय कमिटीको प्रथम विस्तारित बैठक सम्पन्न भएको छ ।
चैत्र १८–१९ गते प्रज्ञा भवन कमलादी काठमाडौँमा सु्निता बरालको अध्यक्षता एवं नेकपा एमालेका अध्यक्ष के.पी. शर्मा ओलीको प्रमुख आतिथ्यतामा बैठक सम्पन्न भएको हो ।
बैठककमा एमालेका उपाध्यक्ष अष्टलक्ष्मी शाक्य, महासचिव शंकर पोखरेल, स्थायी कमिटी सदस्य भानुभक्त ढकाल, केन्द्रीय सदस्य एवम् विद्यार्थी इन्चार्ज माधव ढुङ्गेलले समसामयिक परिस्थिति र स्थानिय तह निर्वाचन परिचालन सम्बन्धमा महत्वपूर्ण प्रशिक्षण दिएका थिए ।
बैठकले समसामयिक राजनीतिक तथा शैक्षिक प्रस्तावहरु पारित गरेको अनेरास्ववियुका अध्यक्ष सुनिता बरालले जनाएकी छन् ।
यस्तै, अखिलले साक्षरता सुधार अभियान, मधेश जागरण र साक्षरता अभियान, सार्वजनिक शिक्षामा गुणस्तर वृद्विका लागि विद्यालयदेखि विश्वविद्यालय सुधार अभियान, प्रशिक्षण सञ्चालन अभियान, संगठन विस्तार तथा सदस्यता वितरण अभियान, प्राविधिक तथा चिकित्सा शिक्षा सुधार अभियान पनि सञ्चालन गर्ने भएको छ ।
