एजेन्सी
इस्लामाबाद । पाकिस्तानमा जारी राजनीतिक उथलपुथलका बीच लण्डनमा बस्दै आएका पाकिस्तानका पूर्वप्रधानमन्त्री नवाज सरिफमाथि हमला भएको छ ।
पाकिस्तानका वर्तमान प्रधानमन्त्री इमरान खानको पार्टी पाकिस्तान तहरीक इन्साफ (पीटीआई) का कार्यकर्ताले यो हमला गरेको बताइएको छ ।
पाकिस्तानमा नवाज शरीफकी छोरी मरियम नवाजले उक्त आक्रमणको निन्दा गर्दै इमरान खानलाई तत्काल पक्राउ गर्न माग गरेकी छन् ।
आइतबार पाकिस्तानको संसद्मा इमरान खानविरुद्धको अविश्वास प्रस्तावमाथि मतदान हुँदैछ ।
पाकिस्तानी पत्रकार अहमद नुरानीले नवाज शरीफमाथि भएको आक्रमणको जानकारी दिएका हुन् । आक्रमणमा नवाज सरिफका एक अङ्गरक्षक घाइते भएको बताइएको छ ।
फ्याक्ट फोकस नामको डिजिटल मिडिया प्लेटफर्मका लागि काम गर्ने नुरानीले ट्विट गर्दै भने, “पाकिस्तानका पूर्व प्रधानमन्त्री नवाज शरीफलाई लण्डनमा पीटीआई कार्यकर्ताले आक्रमण गरेक छन्। पाकिस्तानमा पीटीआई विरुद्ध कारबाही हुनुपर्छ किनभने अहिले पार्टीले सबै सीमा नाघेको छ। शारीरिक हिंसा माफ गर्न सकिँदैन। पीटीआईलाई कारबाही गरेर उदाहरण स्थापित गर्नुपर्छ।”
नवाजका भाइ विपक्षी दलको नेतृत्व गर्दै
यो हमला यस्तो समयमा भएको छ जतिबेला सबैको ध्यान पाकिस्तानको संसद्मा हुन लागेको अविश्वास प्रस्तावको मतदानमा छ ।
इमरान खानले पाकिस्तानका विपक्षी नेता र पीएमएल–एन नेता शाहबाज शरीफ (नवाज शरीफका भाइ) को बारेमा यदि यी मानिसहरू सत्तामा आए भने उनीहरूले ‘अमेरिकाको दासत्व’ गर्ने बताएका छन्।
इमरानलाई १७२ मत आवश्यक
इमरान खानलाई सरकारमा रहन राष्ट्रिय सभामा १७२ मत चाहिन्छ। जबकि पाकिस्तानी समाचार वेबसाइट जियो टिभीका अनुसार खानलाई १४२ सांसदको समर्थन छ भने विपक्षीसँग १९९ सांसदको समर्थन छ । यसैको आधारमा विपक्षीले इमरान खानको राजीनामा माग गरिरहेका छन् ।
पाकिस्तानको इतिहासमा अहिलेसम्म कुनै पनि प्रधानमन्त्रीले पाँच वर्षको कार्यकाल पूरा गरेका छैनन् । त्यसैगरी अविश्वासको प्रस्तावका कारण कुनै पनि प्रधानमन्त्री सत्ताबाट हट्नु परेको छैन । इमरान खान यसको सामना गर्ने तेस्रो पाकिस्तानी प्रधानमन्त्री हुन्।
