काठमाडौं । त्रिकोणात्मक टी–ट्वान्टी अन्तर्राष्ट्रिय सिरिज अन्तर्गत नेपालले मलेसियालाई पराजित गरेको छ ।
शनिबार कीर्तिपुरस्थित टियु मैदानमा भएको खेलमा नेपालले मलेसियालाई ८५ रनले पराजित गरेको हो ।
नेपालले दिएको २२४ रनको विजयी लक्ष्य पछ्याएको मलेसियाले २० ओभरमा १३८ रनमात्र जोड्यो ।
मलेसियाका लागि विरानदीप सिंहले सर्बाधिक ४७ रन जोडे । २६ बल खेलेका उनले ९ चौकाको मद्दतमा उक्त रन बनाएका हुन् । यस्तै, कप्तान अहमद फइजले ३१ बलमा ३३ रन जोडे । सीयद अजिजले १३ बलमा १७ रन जोडे ।
नेपालका लागि सन्दीप लामिछानेले ३ विकेट लिए भने दिपेन्द्र सिंह ऐरी र कमल ऐरीले २–२ विकेट लिए । यस्तै कुशल भुर्तेलले एक विकेट लिए ।
त्यसअघि टस हारेर पहिले ब्याटिङ थालेको नेपालले २० ओभरमा ५ विकेटको क्षतिमा २२३ रन जोड्यो । नेपालका लागि दिपेन्द्र सिंह ऐरीले शतकीय इनिङ्स खेले । ५७ बल खेलेका उनी ११० रनमा अविजित रहे । उनले १० चौका र ६ छक्का प्रहार गरे ।
यस्तै, रोहित पौडेलले ३४ बलमा ५१ रनको अर्धशतकीय इनिङ्स खेले । रोहितले ५ चौका प्रहार गरे । ओपनर कुशल भुर्तेल ८ बलमा ९ रन जोड्दै आउट भए भने आशिफ शेख ९ बलमा १८ रन जोड्दै पेभिलियन फर्किए ।
मलेसियाका लागि मुहम्मद वफिक, पवनदीप सिंह, स्याज्रुल इड्रस र मुहम्मद आमिरले एक–एक विकेट लिए ।
नेपालसँग पराजित भएसँगै मलेसिया फाइनलमा पुग्न असमर्थ भएको छ । नेपाल यसअघि नै फाइनलमा पुगिसकेको छ । नेपालले फाइनलमा पपुआ न्युगिनीसँग खेल्नेछ ।
