एजेन्सी । आगामी वर्ष कतारमा आयोजना हुने विश्वकप २०२२ को अन्तिम ‘ड्र’ आज शुक्रबार हुँदैछ । विश्व फुटबलको सर्वोच्च निकाय फिफाका अनुसार कतारको दोहामा हुने ड्र नेपाली समय अनुसार शुक्रबार राति ९ः४५ मा सुरु हुनेछ।
विश्वकपमा छनोट भएका टिमहरु ८ समूहमा बाँडिनेछन् । फिफा विश्व वरीयतामा आधार पोट १ देखि ४ सम्मका ३२ टोलीलाई बाँडफाँड गरिएको छ ।
विश्वकपका लागि हाल २९ राष्ट्र छानिएका छन् । जसमा आयोजकको रुपमा कतारले पोजिसन ए वानबाट पोट १ मा स्थान लिएको छ । कतारसँगै पोट १ मा विश्व वरीयताको शीर्ष सात टोलीहरुसँग सामेल छन् । जसमा ८ देखि १५ औं स्थानको वरीयतामा रहेका टोली पोट २ मा छन् ।
त्यस्तै १६ देखि २३ औं वरीयतामा रहेका टोलीहरु पोट ३ मा छन् भने पोट ४ मा २४ देखि २८ औं स्थानका वरीयताको टोलीहरु रहेका छन् । यसै पोटमा अन्तरमहादेशीय प्ले–अफका विजेताहरु र यूईएफए प्ले–अफको विजेताहरू सामेल हुनेछन् ।
२०२२ को विश्वकप समरमा हुने तालिका रहेपनि कतारमा हुने गर्मीका कारण यस पटक नोभेम्बर २१ बाट विश्वकपका खेलहरु सुरु हुनेछन् । फाइनल खेल डिसेम्बर १८ मा हुनेछ ।
