काठमाडौँ । काठमाडौँमा जारी टि–२० त्रिदेशीय सिरिजअन्तर्गत आज कीर्तिपुर खेल मैदानमा भएको खेलमा नेपालले पपुवा न्यूगिनीसमक्ष २०३ रनको लक्ष्य दिएको छ ।
टस हारेर ब्याटिङका लागि मैदानमा ओर्लिएको नेपालले निर्धारित २० ओभरमा ७ विकेटको क्षतिमा २०३ रन बनायो । नेपालका लागि दीपेन्द्रसिंह ऐरीले सर्वाधिक ६६ रन बनाए । उनले ३३ बलमा ४ चौका र ३ छक्काको मद्दतमा सो रन बनाएका हुन् ।
नेपालका अन्य ब्याट्सम्यानमा रोहित पौडेलले ४ चौका र २ छक्कासहित ४१ रन, आशिफ शेखले ४ चौका र एक छक्कासहित ३८ रन बनाए । नेपालका लागि डेब्यू गरेका मोहम्मद अदिल आलमले ११ बलमा ३ छक्का र एक चौकासहित ३१ रन जोडे ।
अहिले पपुवा न्यूगिनीले ब्याटिङ गरिरहेको छ । ताजा समाचार अनुसार ३ दशमलव १ ओभरमा पपुवा न्यूगिनीले २ विकेटको क्षतिमा २१ रन बनाएको छ ।
