काठमाडौँ । राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापाले राजसंस्था पुनःस्थापना गर्ने जस्तो असम्भव एजेन्डा नबोक्न राष्ट्रिय प्रजातन्त्र पार्टी (राप्रपा) का नेताहरुलाई आग्रह गर्नुभएको छ ।
सामाजिक सञ्जालमार्फत उहाँले विसं २०६३/६४ ताका मरेको लाश नबोकौँ दाइ भनेर सल्लाह दिनेहरुले अहिले पार्टी कब्जा गरेर आफूलाई धुवाँधार गालीको वर्षा गरिरहेको देख्दा हाँसो लागेको उल्लेख गर्नुभएको छ ।
उहाँले भन्नुभएको छ, “गालीगलौजको सट्टा निर्मल निवासलाई सोध्नोस्– गत १५ वर्षमा राजसंस्था पुनःस्थापना गर्न राजाको के भूमिका रह्यो ? पटकपटक राप्रपा कमजोर पार्ने काम किन भयो ?”
राजसंस्था जस्तो असम्भव एजेन्डा बोकेर आफ्नो र युवाहरुको भविष्यमाथि खेलबाड गर्ने काम छोड्न आग्रह गर्दै अध्यक्ष थापाले आफूले सो एजेन्डा छोडिसकेको बताउनुभयो ।
केही समयपछि भाइहरु राजसंस्थाको एजेन्डा छोडेर आफ्नै बाटोमा आउनुपर्ने उहाँले उल्लेख गर्नुभएको छ ।
केही दिनअघि दुईवटा फेसबुक स्टाटस लेख्दै राप्रपा प्रवक्ता मोहन श्रेष्ठले सार्वजनिक रुपमै थापाको चर्को आलोचना गर्नुभएको थियाे ।
‘राप्रपा फुटाउँदिन, राप्रपा फुटाएको छैन तर राप्रपाका मान्छे बाहेक अरु कोही लिन्न भनेर कसम नै खाएजस्तो देखिँदैछ ! तथापि कुरो नबुझ्ने को होलान् र !’ उहाँले भन्नुभएकाे थियाे ।
