काठमाडौं । नेपाली कांग्रेसको आसन्न १४ औं महाधिवेशनअन्तर्गत अहिले पालिकाहरुमा निर्वाचन भएको छ ।
हालसम्म भएका पालिका (स्थानीय तह) को अधिवेशनमा सभापति शेरबहादुर देउवा पक्षका बलियो पकड देखिएको छ । सात सय ५३ पालिकामध्ये अहिलेसम्म भएका छ सय ५ वटा पालिकामा अधिवेशन सकिएको छ । यीमध्ये दुई सय ५० मा त सभापति देउवा पक्ष निकटका नेता पालिका नेतृत्व जितेका छन् ।
तीमध्ये पनि वरिष्ठ नेता रामचन्द्र पौडेल निकटले एक सय ८० पालिकामा सभापति जितेका छन् । पूर्वमहामन्त्री कृष्णप्रसाद सिटौला पक्षका १६ जनाले पालिका सभापति जितेका छन् भने उपसभापति विजयकुमार गच्छदार पक्षका २ जनाले पालिका सभापति जितेका छन् । पालिका अधिवेशन भए पनि ४९ क्षेत्रका सभापति भने कुन पक्षनिकट हुन् भन्ने खुलेका छैनन् ।
प्रदेश नम्बर १ को १६६ पालिकामा अधिवेशन भएकोमा सभापति देउवा पक्षले ६० पालिकामा जितेको छ भने पौडेल पक्षले ४९ पालिकामा जितेको छ । सिटौला पक्षले १३ पालिका सभापति जितेका छन् ।
त्यसैगरी बागमती प्रदेशमा ९९ वटा पालिकामा अधिवेशन सकिएको छ। यीमध्ये ५३ पालिकामा देउवा पक्षले जितेको छ भने ३३ पालिका पौडेल पक्षले जितेकोमा केही पालिका सभापति भने कतैतिर पनि खुलेका छैनन् ।
गण्डकी प्रदेशमा ८५ पालिकामा अधिवेशन भएको छ । देउवा पक्षले ३९ पालिकामा जितेको छ भने पौडेल पक्षले २७ पालिकामा जितेको स्रोतको दाबी छ ।
लुम्बिनी प्रदेशमा अहिलेसम्म ८८ पालिका अधिवेशन भयो। जसमा देउवा पक्षले ३५ पालिका सभापति जितेको छ । पौडेल पक्षले २९ पालिकामा सभापति जितेका छन् भने केही पालिका सभापतिहरू कतैतिर पनि खुलेका छैनन् ।
कर्णालीमा ६२ पालिकामा अधिवेशन भएको छ । यहाँ ३६ पालिकामा देउवा पक्षले सभापति जितेको छ भने पौडेल पक्षले २६ पालिकामा जितेको छ । कतिपय कुन नेता निकट हुन् भन्ने खुल्न चाहेका छैनन् ।
सभापति देउवाको गृह प्रदेश सुदूरपश्चिम प्रदेशमा हालसम्म १९ पालिकामा मात्रै अधिवेशन भएकोमा १८ पालिका सभापति देउवानिकट छन् । पौडेल पक्षले बझाङको एक पालिकामा मात्रै सभापति जितेको छ ।
‘अहिलेसम्म सकिएका पालिका अधिवेशनबाट सभापति देउवा पक्ष नै बलियो रहेको देखाउँछ,’ देउवानिकट एक नेता भन्छन्, ‘सातै प्रदेशको पालिकामा अहिलेसम्म भएको अधिवेशनमा देउवा पक्ष नै अगाडि छ ।’
कांग्रेसले ६४ जिल्लामा वडा अधिवेशन गरेको थियो । वडा अधिवेशन गरेका अधिकांश जिल्लामा पालिका अधिवेशन भएका छन् ।
अहिलेसम्म १० जिल्लामा जिल्ला अधिवेशन भइसकेको छ । यीमध्ये ६ जिल्लामा पौडेल र ४ जिल्ला सभापतिमा देउवानिकटले जितेका छन् ।
कांग्रेसले मंसिर ९ देखि १३ गतेसम्म १४ औं महाधिवेशन गर्ने भनेको छ। २१ हिमाली जिल्लामा दसैंअगाडि नै जिल्ला अधिवेशन हुने भने पनि रसुवा, डोल्पालगायत ११ जिल्लामा अझै अधिवेशन हुन सकेको छैन ।
