लन्डनः इङलिस प्रिमियर लिग अन्तर्गत आज शनिबार भएको खेलमा चेल्सीले १० खेलाडीमा सीमित नर्बिच विरुद्ध ७ गोल गरेको छ ।
यस सिजन उत्कृष्ट फर्ममा रहेको चेल्सीले शुरु देखि नै नर्बिच विरुद्ध लगातार आक्रमण गरेको थियो । यस खेलमा चेल्सीका मेसन माउन्टले ह्याट्रिक पूरा गरेका थिए । उनले ८, ८५ र ९१ औं मिनेटमा गोल गरेका थिए ।
यस्तै १८औं मिनेटमा क्यालम हडसन ओडोई, ४२ औं मिनेटमा रिस जेम्स, ५७ औं मिनेटमा बेन चिल्वेल र ६२ औं मिनेटमा नर्बिचका म्याक्स आरोन्सले आत्मघाती गोल गरेका थिए ।
नर्बिचका बेन गिब्सनले दुई पहेंलो कार्ड पाएपछि मैदान छाड्नु परेको थियो ।
यो जितसँगै चेल्सीले शीर्ष स्थानलाई अझ मजबूत बनाएको छ । लिग टेबलमा चेल्सीले ९ खेलबाट २२ अंक जोडेर पहिलो स्थानमा रहेको छ भने एक खेल कम खेलेका दोस्रो स्थानको लिभरपुलको १८, तेस्रोको म्यान्चेस्टर सिटीको १७, चौथो स्थानमा रहेको ब्राइटनको १५ र पाँचौं स्थानको टोटेनह्यामको १५ अंक छ ।
क्रिस्टियानो रोनाल्डो सम्मिलित म्यान्चेस्टर युनाइटेड भने १४ अंक सहित छैटौं स्थानमा छ ।
नर्बिच भने यो हारसँगै लिगको पुछारमा पुगेको छ । नर्बिचले हालसम्म २ अंक मात्र जोड्न सकेको छ ।
आजै राति क्रिस्टल प्यालेस र न्यूक्यासल युनाइटेड, एभर्टन र वाटफोर्ड, लिड्स युनाइटेड र उल्भ्स, साउथह्याम्प्टन र बर्नली तथा ब्राइटन र म्यान्चेस्टर सिटीबीच खेल हुँदैछ । एजेन्सी
