दुबईः टी२० विश्वकप क्रिकेट अन्तर्गत शनिबार साँझ भएको दोस्रो खेलमा इङल्यान्डले वेस्ट इन्डिजलाई ६ विकेटले पराजित गरेको छ ।
इङल्यान्डका अलराउन्डर अदिल रसिदले २.२ ओभरमा २ रन खर्चेर ४ विकेट लिएपछि वेस्ट इन्डिज १४.२ ओभरमा ५५ रनमै समेटिएको थियो । रसिदको यो अहिलेसम्मकै सर्वोत्कृष्ट नतिजा पनि हो ।
टस जितेर पहिले क्षेत्र रक्षण रोजेको इङल्यान्डले वेस्ट इन्डिजलाई धराशायी बनाउने क्रममा अर्का अफब्रेक बलर मोइन अलिले ४ ओभर बलिङ गर्दै १७ रन खर्चेर २ विकेट लिएका थिए । यसैगरी टिमाल मिल्सले २, क्रिस जोर्डनले १ र क्रिस वोक्सले १ विकेट लिए ।
आक्रामक ब्याट्सम्यानहरुले भरिएको वेस्ट इन्डिजका खेलाडीहरु खराब शट खेल्दै एकपछि अर्को गर्दै पेभेलियन फर्केका थिए । वेस्ट इन्डिजका विश्व चर्चित ब्याट्सम्यानहरु क्रिस गेल (१३ रन), लेन्डल सिमन्स (३), शिमरोन हेटमायर (९), ड्वायने ब्राभो (५), निकोलास पूरन (१), कायरोन पोलार्ड (६), आन्द्रे रसेल (०) रनमै आउट भएका थिए ।
वेस्ट इन्डिजले प्रस्तुत गरेको ५६ रनको लक्ष्य इङल्यान्डले ८.२ ओभरमा ४ विकेट गुमाएर पूरा गरेको थियो । इङल्यान्डका लागि जस बट्लरले अविजित २४, कप्तान इयोन मोर्गनले अविजित ७ तथा जेसन रोयले ११, जोनी बेरस्टले ९, मोइन अलिले ३ तथा लियाम लिभिङस्टोनले १ रन बनाएका थिए ।
यसअघि आजै भएको पहिलो खेलमा अस्ट्रेलियाले दक्षिण अफ्रिकालाई पराजित गरेको थियो ।
अस्ट्रेलियाको विजयी शुरुआत
अस्ट्रेलियाले टी२० विश्वकप क्रिकेटमा विजयी शुरुआत गरेको छ । अबुधाबीमा भएको खेलमा अस्ट्रेलियाले चिरप्रतिद्वन्द्वी दक्षिण अफ्रिकालाई पाँच विकेटले पराजित गर्यो ।
टस जितेर पहिले फिल्डिङ रोजेको अस्ट्रेलियाले राम्रो बलिङ गर्दै दक्षिण अफ्रिकालाई ११८ रनमै रोकेको थियो । अस्ट्रेलियाली बलरहरुले कसिलो बलिङ गरेका कारण अफ्रिकाले ९ विकेटको क्षतिमा ११८ रन मात्र बनाउन सकेको थियो ।
अफ्रिकाका लागि एडेन मारकरमले सर्वाधिक ४० रन बनाएका थिए । अन्य सबै ब्याट्सम्यान सस्तैमा आउट भएका थिए ।
जितका लागि ११९ रनको सामान्य लक्ष्य पछ्याएको अस्ट्रेलियाले २ बल बाँकी छँदै पाँच विकेट गुमाएर १२१ रन बनाएको थियो । अस्ट्रेलियाका लागि ग्लेन म्याक्सवेल र स्टिभन स्मिथ तथा म्याथ्यु वेड र मार्कस स्टोइनिसबीच भएका दुई साझेदारीले लक्ष पछ्याउन सहज भएको थियो ।
अस्ट्रेलियाका लागि स्टिभन स्मिथले ३५, मार्कस स्टोइनसले अविजित २४, म्याथ्यु वेडले अविजित १५ रन बनाएका थिए ।
दक्षिण अफ्रिकाले पनि अस्ट्रेलिया विरुद्ध राम्रो बलिङ र क्षेत्र रक्षण गरेर अस्ट्रेलियामाथि दबाब बनाएको थियो तर अन्तिम जोडी स्टोइनिस र वेडले खेललाई आफ्नो पक्षमा पारेका थिए ।
