ब्रासिलियाः ब्राजिलको संसद सिनेटको अनुसन्धान समितिले राष्ट्रपति जेयर बोल्सेनारो विरुद्ध महाभियोग लगाउने तयारी गरेको छ । कोरोनाभाइरस महामारी नियन्त्रणमा राष्ट्रपति बोल्सेनारोले बेवास्ता गरेको तथा मानवता विरुद्धको अपराध गरेको संसदीय समितिको ठहर छ ।
संसदीय समितिले राष्ट्रपति बोल्सोनारो विरुद्ध कम्तीमा नौ वटा अपराधमा दोषी पाइएको जनाएको छ । राष्ट्रपतिले कोभिड नियन्त्रणमा लापरवाही गरेको हो वा होइन भन्ने अध्ययन गर्न गठित संसदीय समितिले दिएको प्रतिवेदनका आधारमा बोल्सोनारोमाथि महाभियोगको तयारी गरिएको छ ।
छानबिन समितिको प्रतिवेदन एक हजार ३०० पृष्ठभन्दा लामो छ । विपक्षीहरुको बहुमत रहेको छानबिन समितिले करिब छ महिनाको अनुसन्धान पश्चात प्रतिवेदन तयार पारेको थियो । कोभिडसँग सम्बन्धित विषयमा अरु ७७ व्यक्ति एवं दुई कम्पनीले पनि अपराध गरेको समितिको भनाई छ ।
गत साता प्रकाशित मस्यौदा प्रतिवेदनले राष्ट्रपति बोल्सोनारोमाथि आमहत्याको आरोपमा मुद्दा चलाउन सिफारिस गरेको थियो । तर सिनेटका सदस्यहरुले आमहत्याको आरोप भने फिर्ता लिएका थिए ।
साथै अमेजन राज्यका गभर्नर विल्सन लिमालाई पनि दोषी ठहर गरिएको छ । यसै वर्षको शुरुमा अमेजन राज्यका अस्पतालमा अक्सिजनको अभावमा कोभिड लागेका धेरै बिरामीको अकालमा ज्यान गएको थियो । विल्सनमाथि चिकित्सा उपकरण खरिदसँग सम्बन्धित विषयमा पनि संघीय जाँच भइरहेको छ ।
बोल्सोनारोको संवाद सचिवालयले यस बारेमा केही बताएको छैन ।
तर राष्ट्रपति विरुद्धको मुद्दालाई राष्ट्रपतिले नियुक्त गरेका महान्यायाधीवक्ताले अघि बढाउनु पर्ने हुन्छ जुन तत्कालै सम्भव छैन । राष्ट्रपति बोल्सोनारोले यसअघि नै संसदीय समितिको प्रतिवेदनलाई “जोक”को संज्ञा दिँदै अस्वीकार गरेका थिए ।
ब्राजिलमा कोभिडसँग सम्बन्धित जटिलताका कारण छ लाखभन्दा बढी व्यक्तिको ज्यान गइसकेको छ ।
राष्ट्रपति बोल्सोनारोले कोभिडको संक्रमण तिब्र भए पनि ठुल्ठूला जुलुस र आमसभा गरेको आरोप छ जसका कारण कोभिड व्यापक रुपमा फैलिएको थियो । राेयटर्स
