इङलिस प्रिमियर लिग फुटबल अन्तर्गत गएराति भएको खेलमा लिभरपुलले वेस्टह्यामलाई १-० ले पराजित गरेको छ । यो जितसँगै लिभरपुलले लिग लिडर म्यान्चेस्टर सिटीसँगको अंक दुरी ३ अंकमा झारेको छ ।
लिभरपुलको जितमा साडियो मानेले २७ औ मिनेटमा गरेको एकमात्र गोल निर्णायक बनेको थियो। निकै रोमाञ्चपूर्ण यस खेलमा वेस्टह्यामले केही सुन्दर अवसर सिर्जना गरे पनि गोल गर्न सकेको थिएन ।
शनिबार नै भएको अर्को खेलमा चेल्सीले बर्नलीमाथि ४-० को सहज जित हासिल गरेको छ। पहिलो हाफ गोलरहित बराबरी भएको खेलमा चेल्सीले दोस्रो हाफमा गोल वर्षा गरेको थियो। चेल्सीका लागि रिज जेम्सले ४७ औ मिनेटमा पहिलो गोल गरेका थिए भने फर्वार्ड काई हाभर्टजले लगातार दुई गोल गरेका थिए । उनले ५२ र ५५ मिनेटमा गोल गर्दै टीमलाई ३-० को अवस्थामा पुर्याएका थिए । चौथो गोल क्रिश्टियन पुलिसिकले ६९ औ मिनेटमा गरेका थिए।
त्यस्तै अन्य खेलमा एस्टन भिल्लाले साउथहेम्टनलाई ४-० ले पराजित गरेको थियो भने न्युक्यासलले ब्राइटनलाई २-१ ले हरायो। त्यस्तै नर्विचलाई ब्रेन्टफोर्डले ३-१ ले तथा क्रिस्टल प्यालेसले उल्भ्सलाई २-० ले पराजित गरेको थियो ।
प्रिमियर लिगको २७ औ खेलको समाप्तिमा म्यानचेस्टर सिटी ६६ अंक बनाएर शीर्ष स्थानमा छ । समान २७ खेल खेलेको लिभरपुलको ६३ अंक छ । चेल्सीको ५३ अंक छ भने म्यान्चेस्टर युनाइटेड ४७ अंकका साथ चौथो स्थानमा रहेको छ। युनाइटेडलाई वेस्टह्याम र आर्सनलले ४५ अंकका साथ पछ्याइरहेका छन्।
आज आइतबार साँझ हुने म्यान्चेस्टर सिटी र म्यान्चेस्टर युनाइटेड बीचको खेलले लिगमा अझ रोमाञ्चकता ल्याउने अनुमान गरिएको छ । यदि म्यान्चेस्टर सिटी पराजित भएमा लिभरपुल र सिटीबीच उपाधि दौडमा नयाँ अध्याय शुरु हुनेछ ।
