काठमाडौं । पदाधिकारी चयनमा सहमती जुटाउने प्रयास असफल भएपछि आज (आईतबार) बोलाइएको नेकपा (माओवादी केन्द्र)को केन्द्रिय समिति बैठक भोलीसम्मका लागि स्थगित गरिएको छ ।
पार्टीको पदाधिकारी चयनलगायतका विषयमा सहमती नजुटेपछि भोली बिहान ११ बजेसम्मका लागि पार्टी केन्द्रिय कार्य समितिको बैठक स्थगित गर्ने निर्णय गरिएको पार्टी कार्यालयका मुख्य सचिव श्रीराम ढकालले जानकारी दिनु भएको हो । बैठकका लागि तोकिएको स्थान अनुपम फुडल्याण्डमा उहाँले सञ्चारकर्मीसँग कुरा गर्दै महाधिवेशनको म्यान्डेट अनुसार पदाधिकारी चयनका लागि तयारी पूरा नभएको र संसद बैठक पनि परेकाले आज बोलाइएको केन्द्रिय समिति बैठक भोलीसम्मका लागि स्थगित गर्नु परेको स्पष्ट पार्नुु भयो ।
गत फागुन २० गतेबाट सुरु भएको केन्द्रिय समितिको आजको बैठकमा पार्टीको पदाधिकारी, स्थायी समिति, पोलिटव्यूरो र केन्द्रिय सदस्यहरुको मनोनित गर्ने एजेन्डा तय गरिएको थियो । तर त्यो होमवर्क पूरा हुन नसक्दा आजको बैठक स्थगित हुन पुगेको पार्टी कार्यालयका मुख्यसचिव ढकालले बताउनु भयो । उहाँले भन्नु भयो, ‘अलिकति तयारी नपुगेको कारणले गर्दा आज ११ बजे हुने भनिएको बैठक २ बजेसम्मका लागि स्थगित भएको थियो । आज फेरी १ बजेका लागि संसद पनि भएको कारणले होमवर्क पनि यता पूरा भएन । तयारी पनि कम्प्लेट हुन सकेन । उता, संसद पनि अवरोध भएको कारणले गर्दाखेरी आजको बैठक स्थगित भएको छ । र, भोली यही अनुपम फुडल्याण्डमा बस्नेगरी आजको बैठक स्थगित भएको छ ।’
यसैबीच, नेकपा (माओवादी केन्द्र)का केन्द्रिय सदस्य हिमाल शर्माले अन्तिम समयमा आएर पार्टी केन्द्रिय समितिको बैठक स्थगित गरिएको भन्दै असन्तुष्टि व्यक्त गर्नु भएको छ । उहाँले पदाधिकारी चयनमा कुरा नमिले तत्काल केन्द्रिय समिति बैठकमा ल्याएर सहमती गर्न पनि पार्टीको नेतृत्वसँग माग गर्नु भयो । शर्माले एमसीसीबारे बैठकमा समिक्षा गर्ने र धेरै जित्यौं भन्ने पक्षमा आफू नरहेको पनि स्पष्ट पार्नु भयो । उहाँले भन्नु भयो, ‘बारम्बार यसरी केन्द्रिय समिति बैठक बोलाएर स्थगित हुने कुरा राम्रो होइन । त्यहाँ, नेताहरुबीच भएका, नमिलेका कुराहरु के–के हुन ? नेताहरुले केन्द्रिय समिति बैठकमा ल्याउनुप¥यो भन्ने माग म गर्न चाहन्छु । त्यहाँ जोडकोण कहाँ मिलेको छैन । केन्द्रिय समिति भनेको के हो त ? आएर बैठकमा राख्नु प¥यो, त्यहाँ नमिलेका कुरा । जहाँसम्म एमसीसीको कुरा राख्नु उठाउनु भयो । त्यसको समिक्षा गर्छौ । तर एमसीसीमा धेरै जित्यौं भन्नु हुँदैन ।’
अर्का केन्द्रिय सदस्य दलजीत विक श्रीपालीले एमसीसीलाई देखाएर पार्टी भित्र विभाजनको रेखा नर्कोर्न नेता नारायणकाजी श्रेष्ठलाई चेतावनी दिनु भयो । उहाँले चुनावको सामना गरेर जाने बेला नेताहरुले फरकमत राखेर पार्टीमा गुट बनाउन नपाउने बताउनु भयो । केन्द्रिय सदस्य श्रीपालीले भन्नु भयो, ‘नेताहरुले गुट बनाउन पाउँदैनन् । नेताहरु जहिले पनि एकतावद्ध हुनुपर्छ । चुनावको सामना गरेर जानुपर्छ । एमसीसीको नाममा फरक मत राखेर नेताहरुले पार्टी विभाजनको रेखा कोर्न हुन्न ।’
एमसीसीको कारण पार्टी विभाजन नहुने केन्द्रिय सदस्य रत्न ढकालको दावी छ । पार्टीमा फरक मतको जहिले पनि सम्मान हुने उल्लेख गर्दै उहाँले केन्द्रिय समिति बैठकमा पनि एमसीसीबारे छलफल हुने बताउनु भयो । तर त्यसैकारण पार्टी विभाजन नहुने उहाँको भनाई थियो । ढकालले भन्नु भयो, ‘एमसीसीका विषयमा पार्टी भित्र फरक मत राख्न पाईन्छ । फरक मतको पार्टी भित्र जहिले पनि सम्मान हुन्छ नै । तर त्यो कारणले केन्द्रिय समिति बैठक स्थगित भएको होइन । एमसीसीका कारण माओवादी पार्टी विभाजन हुँदैन । तर पार्टी भित्र छलफल हुन्छ ।’
केन्द्रिय सदस्य ढकालले एमसीसीको कारण पार्टीको बैठक स्थगित हुने अवस्था नरहेको पनि बताउनु भयो ।
