• १६ चैत्र २०८०, शुक्रबार
  •      Fri Mar 29 2024
  •   Unicode
Logo
Latest
★   नेविसंघद्वारा सरकारविरुद्ध सडकमै हवन गरेर बिरोध ★   सीमा क्षेत्रका बासिन्दाले भोग्नुपरेका समस्या समाधान गर्न उपप्रधानमन्त्री श्रेष्ठको आग्रह ★   एकीकृत समाजवादीः बागमती प्रदेशका पाँच जिल्ला अधिवेशन सम्पन्न ★   राष्ट्रपतिद्वारा विधेयक प्रमाणीकरण ★   अर्थराजनीतिक दृष्टिकोणमा आधारित परराष्ट्र नीति नेपालको प्राथमिकताः डा सापकोटा ★   बङ्गलादेशी नागरिकलाई नेपाल ल्याई बन्धक बनाउने पक्राउ ★   अर्थमन्त्री वर्षमान पुनले गरे बजेट लेखन समिति गठन ★   मन्त्रिपरिषद् बैठकः सरकारद्वारा तथ्यांक नियमावली २०८० लाई स्वीकृत, यस्ता छन् अन्य निर्णयहरु ★   विज्ञान र प्रविधिको क्षेत्रमा पहुँच पुर्‍याउने शिक्षा अध्यापन गराउनुपर्छः पूर्वराष्ट्रपति भण्डारी ★   सुदूरपश्चिम सरकार छाड्न नाउपा अध्यक्ष रञ्जिताद्वारा लिखित निर्देशन

नक्कली मतपरिणाम स्वीकार गर्दैनौं, जनतामा जान्छौं




पहिला संविधानसभा निर्वाचन अभूतपूर्व रुपमा सफल भयो भनेर विज्ञप्ति जारी गर्नुभयो, फेरि अहिले षड्यन्त्र भयो भन्नु भएको छ ? यसले आममानिसमा भ्रम सिर्जना 
गराएन र ?

पहिलो संविधानसभाबाट संविधान बन्न नसकेपछि हाम्रै पहल र अग्रसतामा दोस्रो संविधानसभा निर्वाचन सम्भव भएको हो । संविधानसभा निर्वाचनमा नेपाली जनताले देशभर विवेकपूर्ण मतदान गरेका हुन् । निर्वाचन स्वच्छ र निष्पक्ष रुपमा सम्पन्न भएकामा कसैको शंका छैन । तर, जब मतदान सकियो र मतपेटिकाहरु जिल्ला सदरमुकामहरुमा लैजाने क्रम सुरु भयो त्यसपछि हामीले षड्यन्त्रको गन्ध पाएका थियौं ।

धेरै ठाउँहरुबाट सुरक्षाकर्मीले मतपेटिकासँग हाम्रा प्रतिनिधिहरुलाई तोकिएको मतगणना केन्द्रसम्म आउन नदिएको र मतपत्र भएको ठाउँमा पस्न नदिएको खबर आएको थियो । तर, हामीले त्यसलाई षड्यन्त्रका रुपमा बुझ्न सकेनौं र राज्यको संयन्त्रको नियन्त्रणमा मतपेटिकाहरु भएकाले स्वाभाविक रुपमा विश्वासमा पर्‍यौं ।

तर देशभरबाट एकै प्रकारका रिपोर्टहरु आउन थाले र मतगणना सुरु भएका केही स्थानमा त्यसका संकेतहरु देखिन थाले त्यसपछि षड्यन्त्र भएको निष्कर्षमा पुग्यौं र त्यसविरुद्ध उत्रन बाध्य भयौं ।

यत्तिकै कारणले तपाईंहरु निर्वाचन प्रक्रियाबाट बाहिरिन खोज्नुभएको हो भने यो त्यति तर्कसंगत नहोला फेरि तपाईंहरुले यस्ता विषयमा पूर्वसतर्कता अपनाएको पनि देखिएन नि ?

त्यतिमात्र होइन । धेरै ठाउँहरुमा मतपेटिकाको सिल तोडिएको छ । बाहिर मतदानकेन्द्रहरुमा जनताले मतदान गरिरहेका बेला अमुक स्थानहरुमा नक्कली भोटिङका कामहरु भएका थिए भन्ने सूचना आइरहेका छन् । अर्को कुरा निर्वाचन आयोगले सिल तोडिएका मतपेटिकाबाट पनि मतगणना गर्न निर्देशन दिइएको छ । यसले पनि डिजाइनमै सबै काम भएको हो भन्ने छर्लङ्ग हुन्छ ।

पूर्वसावधानी अपनाउन नसक्नुमा हाम्रा तर्फबाट पनि केही कमजोरी भएका छन् । हामीले देशभरका पार्टीपंक्तिलाई ‘अलर्ट’ राख्नमा ध्यान दिएनौं । पहिल्यैदेखिको डिजाइन रहेछ । त्यो हामीलाई थाहा भएन । मत खसालिसकेपछि त्यसको सुरक्षा गर्न सकिएन ।

यति सबै कुरा थाहा रहेछ तर पहिल्यै किन सार्वजनिक नगरेर मतगणना गर्न सहमत हुनुभएको त ?

मैले अघि पनि भनें, पहिला केही नगन्य सूचनाहरु आएका थिए । निर्वाचनका क्रममा एकाध यस्ता घटना हुनुलाई ठूलो मानिँदैन । हामीले पनि यसलाई सामान्य रुपमा लियौं । तर, जब मतगणनाकार्य सुरु भयो देशभरबाट षड्यन्त्र भएका खबरहरु आउन थाले । त्यसबारेमा तथ्यहरुसमेत फेला परे । त्यसपछि हामी मतगणनाकेन्द्रबाट बाहिरियौं ।

त्यस्ता तथ्यहरु के के हुन् ? जनतालाई भनिदिनुस न ?

मैले माथि उल्लेख गरेका तथ्यहरु नै काफी छन् । यसअघि निर्वाचन सकिएपछि मतपेटिका संकलन सकिएलगत्तै मतगणनाको काम सुरु गरिन्थ्यो । प्रमुख निर्वाचन आयुक्तले निर्वाचन सम्पन्न भएलगत्तै गरेको पत्रकार सम्मेलनमा मतपेटिका संकलन भइसकेका सुगम जिल्लाहरुमा सोही दिन र दुर्गम जिल्लाहरुमा भोलिपल्टबाट मतगणना सुरु गर्ने बताएका थिए ।

यो कुरा मैले भनेको होइन । प्रमुख निर्वाचन आयुक्तका मुखबाट धेरैले सुनेका थिए । अधिकांश टिभी च्यानलहरुले पत्रकार सम्मेलनको प्रत्यक्ष प्रसारण गरेका थिए । तर, किन सोही दिन मतगणना सुरु गरिएन र त्यसबारे हामीलाई थाहा दिइएन ? डिजाइन थियो भन्ने कुरा यही घटनाबाट पनि पुष्टि हुँदैन र ?
अर्को कुरा सिल तोडिएको मतपेटिकाका मत गन्न निर्वाचन आयोगबाट निर्देशन हुनुले पनि डिजाइनको संकेत गर्छ ।

तपाईंको विचारमा त्यो डिजाइनको अगुवाई कसले गरेको थियो ?

यसबारेमा हामीले भनिरहनु नै पर्दैन । मैले अगाडि नै केही संकेतहरु गरिसकेको छु । जसले समग्र निर्वाचन प्रक्रियाको नेतृत्व गरेको छ षड्यन्त्रको नेतृत्व पनि उसैले गरेको प्रष्ट छ ।

अब के गर्नुहुन्छ ?

हामीले निर्वाचन प्रक्रिया पुनरावलोकन गर्न आग्रह गरेका छौं । पुनरावलोकन भएन भने हामी नक्कली परिणाम स्वीकार्दैनौं र संविधानसभामा पनि जाँदैनौं । केन्द्रीय समितिको बैठक बोलाइएको छ । त्यतिखेरसम्म षड्यन्त्रका बारेमा धेरै तथ्यहरु संकलन भइसक्छन् होला । केन्द्रीय समितिको बैठकमा छलफल हुन्छ । अनि कसरी अगाडि बढ्ने भन्ने निर्णय गर्छौं ।

संविधानसभाको एजेण्डा आफ्नै भएको दाबी गर्नुहुन्छ । अनि संविधानसभामा पनि जान्नौं भन्नुहुन्छ । यो कुरा त मिलेन नि ?

संविधानसभाका लागि हामीले धेरै ठूलो कुर्बानी गरेका छौं । शान्तिपूर्ण तरिकाले मुलुकको आर्थिक, सामाजिक, साँस्कृतिक रुपान्तरण सम्भव तुल्याउनका लागि हामीले संविधानसभाको एजेण्डा अघि सारेका हौं । त्यसैका लागि हामी १० वषजनयुद्ध थाति राखेर संविधानसभामा आएका हौं । हामीले संविधानसभाबाट वर्षे जनताको संविधान दिने बाचा गरेका छौं ।

तर, अहिले जसरी षड्यन्त्र गरियो र जुन परिणाम देखाउन खोजिएको छ त्यस्तो संविधानसभाले जनपक्षीय संविधान दिन सक्दैन । संविधानसभा पश्चगामी र यथास्थितिवादीहरुको हतियार बन्नसक्ने खतरा देखियो । त्यसैले यस्तो अवस्थामा हामी संविधानसभामा जानुको औचित्य छैन ।

तपाईंहरुले भने जसरी पुनरावलोकन गर्न अर्को पक्ष तयार भएन भने के गर्नुहुन्छ ?

मैले अघि नै भनिसकें नि यस्तो कृत्रिम परिणाम हाम्रा लागि स्वीकार्य छैन । आमजनता हाम्रा पक्षमा छन् । हामीसँग जनयुद्धबाट आएका लाखौं कार्यकर्ताको संगठित शक्ति छ । त्यहीमार्फत जनपरिचालन गर्छौं । तर, झुटो परिणाम कुनै हालतमा स्वीकार्न सक्दैनौं ।

सामाजिक सञ्जालमा तपाईंहरुले पछिल्लो चार/पाँच वर्षमा जनताका पक्षमा केही पनि नगरेकाले पराजय भोग्नुभयो भन्नेहरु धेरै देखिए । के भन्नुहुन्छ ?

यो विलकुल गलत कुरा हो । राजनीतिक रुपमा गाइडेड विपक्षी पार्टीका केही कार्यकर्ताले यस्ता कुरा गरिरहेका छन् । म आफैं पनि फेसबुक चलाउँछु । जसले तपाईंले भनेजस्ता प्रतिक्रिया आफ्ना वालमा लेखिरहेका छन् ति सबैलाई प्रत्यक्ष/अप्रत्यक्ष रुपमा म चिन्दछु । यदि हाम्रो पार्टीले जितेको भए माओवादीले धाँधली गर्‍यो भन्ने उनीहरु नै हुने थिए ।

नेपालमा कति मानिस फेसबुक र ट्वीटर चलाउँछन् ? के उनीहरुले सबै जनताको प्रतिनिधित्व गर्न सक्छन् ? हामी हिजो र आज पनि के विश्वास गर्छौं भने नेपाली जनता परिवर्तनको पक्षमा छ । नेपाली जनताले हाम्रो नेतृत्वमा नेपालको भाग्य र भविष्य फैसला गर्न सकिन्छ भन्ने विश्वास राख्दछन् । निर्वाचनमा जनताले भारी मत दिएर पठाएका पनि हुन् ।

तर, जनताले दिएको भन्दा फरक परिणाम आयो । सारा संसारले देखेको छ निर्वाचन तयारीका क्रममा हाम्रो पार्टीका पक्षमा देशभर कस्तो लहर थियो । मेचीकाली अभियानका क्रममा लाखौं मान्छे सडकमा आएका थिए । यो सबैले देखेका छन् । के अरु कुनै पार्टीका पक्षमा देशभर यस्तो लहर आएको देख्नुभएको थियो ?

तर, मानिसहरु के भन्छन् भने तपाईंहरुका आमसभामा भाषण सुन्न आउनेहरुको मतदाता सूचीमा नामै थिएन ।

लाखौं मान्छेमा केही त्यस्ता मानिसहरु पनि थिए होलान् । तर, हामी त निर्वाचनका क्रममा जनताका घर–घरमा पुगेका छौं । मतदाता सूचीमा नाम लेखाएकाहरुसँगै साक्षात्कार गरेका छौं । त्यति मात्र होइन देशभर कसले हाम्रा पक्षमा मतदान गर्‍यो भन्ने एक/एक हिसाब हामीसँग छ । देशभरका जनतालाई सोध्नुस् उनीहरु आफूले जिताएर पठाएका उम्मेदवारले पराजय भोगेको खबरहरु सुनेर चकित र आक्रोशित भएका छन् ।

तपाईंहरु निर्वाचन प्रक्रिया पुनरावलोकन नगरेसम्म प्रक्रियामै सहभागी नहुने र संविधानसभामा पनि नजाने भनिरहनुभएको छ । तर, कांग्रेस सभापति सुशील कोइरालाले तपाईंहरुले त्यसो गर्नुभयो भने परिणाम घातक आउने चेतावनी दिएछन् ?

हामी कसैका धम्कीसँग डराउँदैनौं । यस्ता धम्की र चेतावनीका भाषा उहाँहरुले धेरै वर्षदेखि बोल्दै आउनुभएको हो । देश र जनताविरुद्ध भएका भयानक षड्यन्त्र कसैको आग्रह वा चेतावनीका कारण हामी स्वीकार्न सक्दैनौं । हामी जनताको शक्तिमा विश्वास गर्छौं । त्यसैले जनताको अभिमतविरुद्ध भएको यति ठूलो अपमान कुनै हालतमा स्वीकार्न सक्दैनौं र अरु कसैले दिएको नक्कली हैसियत स्वीकारेर संविधानसभामा पनि जाँदैनौं । तर, त्यसबारे संस्थागत निर्णय भने केन्द्रीय समितिको बैठकले गर्छ ।

तपाईंले जनपरिचालन गर्ने भन्नुभएको छ । यो जनपरिचालन भनेको के हो ?

त्यसको स्वरुपका बारेमा केन्द्रीय समितिको बैठकमा छलफल हुन्छ ।

तपाईंहरु अब के गर्नुहुन्छ ?

दृष्य अदृष्य हर्कत र षड्यन्त्रहरु निर्वाचनका क्रममा भएका छन् । त्यसको आम जनतामाझ भण्डाफोर गर्छौं । अहिले हामी तथ्यहरु संकलनका क्रममा छौं । एकपछि अर्का नयाँनयाँ र रहस्यमय तथ्यहरु आइरहेका छन् । देशभर मतपेटिका फेरिएको छ । मतपेटिकाबाट हाम्रो मत झिकिएको छ । परिवर्तन, अग्रगमन, नेपाली जनताको इच्छा र भावनाविपरित जे गतिविधि भए त्यसको गम्भीर समीक्षा गर्छौं र जनतामा जान्र्छौं । जनतामा जानुको विकल्प हामीसँग छैन ।

मतपेटिका सुरक्षाको जिम्मा नेपाली सेनाले लिएको थियो । सैनिक क्याम्पभित्र राखिएको मतपेटिका कसरी परिवर्तन हुन सक्छ ?

अघिल्लो संविधानसभा निर्वाचनमा पनि पृष्ठभागमा रहेर नेपाली सेनाले सुरक्षाको जिम्मेवारी लिएको थियो । यसपटक पनि गर्ने भनेको त्यही हो । सेना परिचालन भनेर जे अफवाह फैलाइयो खासमा सेना परिचालन गरिएको होइन । खाली अन्य सुरक्षा निकायको समन्वयमा ‘ब्याकअप’का रुपमा काम गर्ने मात्र भनिएको हो । तर, त्यसो भएन ।

२०६४ सालमा भएको संविधानसभा निर्वाचनमा मतपत्रसँगै पार्टीका प्रतिनिधिहरु आएका थिए । उनीहरु मतपेटिका कुरेर रातभर बसेका थिए । तर, यसपटक त्यसो गर्न दिइएन । सेनाको ब्यारेकमा वा उनीहरुको नियन्त्रित स्थानमा मतपत्र राखियो । कतिपय स्थानमा त मतपत्र राखिएका ठाउँमा जिल्लास्थित प्रहरी प्रमुखलाई समेत जान दिइएको छैन । यो सबै डिजाइनमा भएको हो ।

त्यसो भए यो कुरा पहिल्यै भन्नुपर्नेमा हार्ने पक्का भएपछि मात्र किन भन्नुभयो त ?

हामीले सबैको विश्वास गर्‍र्यौं । तर, हामीमाथि विश्वासघात भयो । म तपाईंलाई एउटा उदाहरण भनौं । टाढा जानै पर्दैन काठमाडौंको त्रिपुरेश्वरमा नौ नम्बर क्षेत्रको मतपेटिका बोकेको गाडी दुर्घटना भयो भनेर गलत हल्ला चलाइयो । त्यहाँ कुनै मतपेटिका बोकेको गाडी दुर्घटना भएकै छैन । तर, दुर्घटना भएको बहनामा त्यसको सात घण्टापछि मात्र मतपेटिका अन्तर्राष्ट्रिय सम्मेलन केन्द्रमा पुर्‍याइयो । अब आफैं कल्पना गर्नुस् यो बीचमा केके गडबढी भयो होला ?

एक छिनका लागि तपाईंले भनेका सबै कुरा सही नै मानिदिउँ तर, यो कुरा समयमै नभनेर किन पछि भन्नुभयो क्या ?

दुर्घटना भएको भनियो । हामीले होला भन्ने ठान्यौं । तर, त्यहाँ मतपत्र बोकेको सेनाको गाडि नभई प्रहरी र कर्मचारी बोकेको प्रहरीको भ्यान दुर्घटना भएको रहेछ । यो कुरा पछि मात्रै थाहा भयो । यो त एउटा प्रतिनिधि घटना मात्र हो ।

जब देशभरबाट एकपछि अर्को तथ्यहरु आउन थाले त्यसपछि मैले हेर्डक्वार्टरको निर्देशनमा प्रवक्ताको हैसियतले राति नै विज्ञप्ति जारी गरेको हुँ । पछि भनेकै होइन । जनतामाथि घात भयो, अपमान भयो । त्यसलाई स्वीकार्न हुन्न भन्ने ठहर केन्द्रीय कार्यालयको बैठकले राति नै गरिसकेको हो त्यसपछि मतगणना केन्द्रमा रहेका सबै प्रतिनिधिलाई बाहिर आउन भनियो ।

यो सबै किन भयो होला त ?

यी सबै षड्यन्त्र पश्चगमन तथा नेपाली जनताको भाग्य र भविष्यको फैसलाप्रति परिलक्षित छ । पुनरावलोकन भएन भने जनपरिचालन गर्नुको विकल्प छैन । जनतामा गएर तपाईंहरुले हामीलाई जिताएर पठाउनुभएको हो तर, षड्यन्त्रपूर्वक हारेको देखाइयो भन्छौं ।

पुनरावलोकन भनेको के हो ?

निर्वाचन प्रक्रिया, खासगरी मतगणना प्रक्रियाको छानबिन गरिनुपर्‍यो । भएका त्रुटिहरु सच्याउनुपर्‍यो । यस्तो बेलामा चुप लागेर बस्नुजस्तो लाजमर्दो अरु के हुन्छ ?

अब के सडक आन्दोलनमा जानुहुन्छ ?

देशलाई पछाडि धकेल्ने षड्यन्त्र भएपछि आवश्यकताअनुसार जे पनि गर्न सकिन्छ । त्यसबारे केन्द्रीय समितिले निर्णय लिन्छ ।

शान्तिप्रक्रियाको भविष्य अब के हुन्छ ?

हामी शान्तिप्रक्रियाबाट पछि हट्दैनौं । परिवर्तन, अग्रगमन र पहिचानसहितको संघीयता ग्यारेण्टीका लागि दलहरुसँग वार्ता जारी राख्छौं । सँगसँगै जनपरिचालन पनि गर्छौं । यो प्रक्रिया सच्याउनतिर गइएन भने चुप लागेर बस्दैनौं । हामीलाई योजनावद्ध रुपमा हारेको देखाइएको हो । परिवर्तनको प्रक्रिया तोड्न हराएको नाटक गरिएको हो । हामी हार स्वीकार गर्दैनौं ।

तपाईंहरुको अनुपस्थितिमा संविधानसभाबाट संविधान जारी भयो भने के गर्नुहुन्छ ?

षड्यन्त्रकारीहरुले २०४७ सालको फोटोकपी संविधान जारी गर्न चाहेका छन् । त्यसलाई कदापि सफल हुन दिँदैनौं । नेपाली जनताले पहिचान र परिवर्तन खोजेका छन् । फोटोकपी संविधान जनताले स्वीकार गर्दैनन् ।

संविधानसभा छोड्दा त जनतालाई नयाँ संविधान दिने अवसरबाट विमुख बन्ने हुनुभयो नि होइन र ?

जुन लक्ष्य र उद्देश्यका लागि संविधानसभाको एजेण्डा उठाइयो त्यो नहुने भएपछि संविधानसभाको औचित्य के रह्यो र ? हाम्रै पार्टीको पहलमा संविधानसभा सम्भव भएकाले त्यसलाई असफल पार्न यो षड्यन्त्र भएको हो । षड्यन्त्र स्वीकारेर बस्नेजस्तो नामर्दपन के हुन्छ ? संविधानसभा जनताको हितविपरित प्रयोग गराउने डिजाइन आइसक्यो । त्यसैले सुतुरमुर्ग जसरी चुप लागेर बस्न कुरा आउँदैन ।