काठमाडौं, २८ मंसिर । राष्ट्रिय प्रजातन्त्र पार्टी नेपालले पृथ्वी जयन्तीका दिन सार्बजनिक विदा दिन सरकारसँग माग गरेको छ ।
अध्यक्ष कमल थापाको नेतृत्वमा गएको उच्चस्तरीय प्रतिनिधि मण्डलले आज प्रधानमन्त्री सुशील कोइरालासँग बालुवाटारमा भेटवार्ता गरी पौष २७ गते पृथ्वी जयन्तीको दिन सार्वजनिक विदा दिन माग गर्दै ज्ञापनपत्र बुझाएको हो ।
भेटवार्ताको क्रममा संविधान निर्माणको सम्बन्धमा पनि कुराकानी भएको राप्रपा नेपालले जनाएको छ । राप्रपा नेपालका अध्यक्ष थापाले निर्धारित समयभित्र संविधान निर्माण हुनुपर्ने र त्यो संविधानमा नेपाललाई सनातन धर्म सापेक्ष हिन्दुराष्ट्र सुनिश्चित हुनुपर्ने आफ्नो पार्टीको अडान प्रधानमन्त्री समक्ष राखेका छन् ।
थापाले सहमति निर्माणको क्रममा मुलुकको चौथो महत्वपुर्ण राजनीतिक शक्तिलाई निषेध गरिएको बिषयलाई आफुहरुले गम्भिरतापूर्वक लिएको पनि वताए ।
भेटवार्ताको क्रममा हालै वेलायती राजदुतले धर्म परिवर्तन गर्ने÷गराउने अधिकार सुनिश्चित हुनुपर्छ भनि दिएको अभिव्यक्तिप्रति प्रधानमन्त्रीको ध्यानाकर्षण गराइएको थियो ।
जवाफमा प्रधानमन्त्री कोइरालाले मुलुक गम्भिर मोडमा रहेकाले सकेसम्म सहमतिबाटै संविधान निर्माण गर्ने, सहमतिका लागि अन्तिमसम्म प्रयत्न जारी राख्ने, नभए विधि र प्रक्रियाबाट भएपनि माघ ८ गतेभित्र संविधान जारी गर्न आफु प्रतिवद्ध रहेको बताए ।
प्रधानमन्त्री कोइरालाले निर्धारित मितिमा संविधान जारी नभए मुलुक अस्थिरता तर्फ जान सक्ने खतरा रहेकाले आफुलाई सहयोग गर्न राप्रपा नेपालसँग आग्रह गरे । प्रधानमन्त्री कोइरालाले राप्रपा नेपाललाई निषेध गर्ने आफ्नो नियत र मनसाय नरहेकाले सवैको सल्लाह अनुसार आफु अघि बढ्ने धारणा व्यक्त गरे ।
बेलायती राजदुतको भनाई आपत्तिजनक रहेको भन्दै प्रधानमन्त्री कोइरालाले यस सम्बन्धमा परराष्ट्र मन्त्रालय मार्फत जानकारी लिने र आवश्यक परे राजदुतलाई बोलाएरै भएपनि संवेदनशील विषयमा सार्वजनिक रुपमा अभिव्यक्ति नदिन सचेत गराउने पनि प्रतिनिधिमण्डललाई विश्वास दिलाए ।
राप्रपा नेपालका अध्यक्ष थापाले बुझाएको ज्ञापनपत्र ग्रहण गर्दै प्रधानमन्त्री कोइरालाले संसारभर राष्ट्रनिर्मातालाई इज्जत र सम्मान दिएको प्रसंग उल्लेख गर्दै पृथ्वीनारायण शाहलाई सम्मान दिने विषयमा आफु सकारात्मक रहेको प्रतिक्रिया दिए । राप्रपा नेपालले पृथ्वी जयन्तिको अवसरमा सार्वजनिक विदा दिन, राष्ट्रिय एकता दिवसलाई पर्वको रुपमा मनाउन र नेपाली नोटमा श्री ५ पृथ्वीको तस्वीर अंकित गर्ने व्यवस्थाको माग राख्दै आज प्रधानमन्त्रीलाई ज्ञापनपत्र बुझाएको हो ।
प्रतिनिधि मण्डलमा राप्रपा नेपालका अध्यक्ष थापा, उपाध्यक्षद्धय टंक ढकाल, निरञ्जन थापा, महामन्त्री चन्द्रबहादुर गुरुङ्ग र सहप्रवक्ता मोहन श्रेष्ठ सहभागी थिए ।