नेकपा–माओवादीका सचिव देव गुरुङले माघ ८ मा कुनैपनि हालतमा संविधान नबन्ने बताएका छन् । बिजुवारमा भएकोे पत्रकारसम्मेलनमा उनले सत्तापक्षको आन्तरिक विवादका कारण नै संबिधान नबन्ने बताएका हुन् । “सत्ता पक्षले विपक्षलाई मिलाउन नसक्ने पक्का छ”–उनले भने–“सत्ता साझेदार दल काँग्रेस र एमाले बीचमा सरकार बदल्ने भन्दै आन्तरिक विवाद सुरु भइसकेको छ ।”
जनताले जनपक्षीय संबिधानलाई मात्र मान्ने भन्दै उनले अहिले कुनै कारणवश संविधान आए पनि त्यसलाई स्वयम् जनताले नमान्ने दाबी गरे । अर्को एक प्रसङ्गमा उनले आफूहरुले एमाओवादी र विप्लवको माओवादीमा नभई उनीहरु आफ्नो पार्टीमा समाहित हुन आउनुपर्ने जिकिरसमेत गरे ।
कमजोर–कमजोर एक हुने समय आएको भन्दै उनले एमाओवादीसँग विभाजन भएको दिनलाई सङ्केत गर्दै पार्टी विभाजन भएपछि सबै समूह सोचेभन्दा कमजोर भएको बताए । “एमाओवादीले जनयुद्धका मुद्दालाई सम्बोधन गर्ने र नेत्रविक्रम चन्द ‘विप्लव’ले पदको लोभ त्याग गरे पार्टी एकता हुन्छ”–उनले भने–“अब सबै माओवादीको एकताबिना केही पनि सम्भव छैन ।”
