काठमाडौं, भदौ ५ । नेकपा एमालेका अध्यक्ष केपी ओलीले संविधान जारी गर्नबाट कसैले रोक्न नसक्ने दाबी गरेका छन् ।
तेह्रथुम सरोकार समाज नेपालले शनिबार राजधानीमा आयोजना गरेको कार्यक्रममा अध्यक्ष केपीले मस्यौदा परिमार्जन गर्दै विधेयक तयार भइसकेकाले अब चाँडै संविधान जारी हुने दाबी गरे ।
उनले भने–‘यो प्रारम्भिक मस्यौदा होइन । जनताका राय समेटेर यो प्रारम्भिक मस्यौदा होइन । जनताका राय समेटिएको परिमार्जित रुप हो । अब कसैले कुनै तरिकाले पनि संविधान रोक्न सक्दैन ।’ संविधान जारी गर्न नदिन धेरै प्रकारका खेल भइरहेकाले सर्तक रहन पनि ओलीको आग्रह थियो ।
सोही कार्यक्रममा कांग्रेस महामन्त्रीसमेत रहेका संविधान मस्यौदा समितिका सभापति कृष्ण सिटौलाले अझैं पनि जनताका राय समेट्ने सम्भावना रहेको बताए ।
‘अझैं तीन दिन सुझाव समेट्ने अवसर छ । संविधानमा सुझाव दिएर परिमार्जन गर्न सकिन्छ’–सिटौलाले भने, ‘सुझाव दिँदा प्रदेशमा मात्र नहेर्नुस् । राम्रो संविधान बनाउने सुझाव दिनुस् ।’
सो अवसरमा तेह्रथुम जिल्लामा जन्मेर नेपाली राजनीतिको उच्च ओहोदामा पुगेको भन्दै तेह्रथुम सरोकार समाज नेपालले एमाले अध्यक्ष केपी ओली, कांग्रेस महामन्त्री कृष्ण सिटौला र माले महासचिव सीपी मैनालीलाई अभिनन्दन गरेको थियो ।
