न्युजपोलार समाचारदाता
१२ मंसिर, काठमाडौं । सत्तारुढ नेपाल कम्युनिस्ट पार्टी (नेकपा) को सचिवालय बैठक हिजो पनि स्थगित भयो । नियमित बस्ने भनिएको सो बैठक हिजो तेस्रो पटक अन्तिममा आएर रोकिएको बताइएको छ । पार्टी भित्र छलफल हुनुपर्ने माग यसअघि पनि निकै लामो समयदेखि पार्टीभित्रैबाट उठ्दै आएको हो । पार्टी केन्द्रीय कमिटी बैठक माग गर्दै ८ बुँदे ज्ञापनपत्र बुझाएका २२ केन्द्रीय सदस्यहरुले सचिवालय बैठक किन नबसेको भनी प्रश्न पनि गर्ने गरेका छन् । यसरी प्रश्न उठेको भए पनि अझै बैठक बस्न सकेको छैन । ती सदस्यहरुले भने पार्टीका अध्यक्ष प्रचण्डसँग मंगलवार भएको भेटमा प्रचण्डले बैठक बस्न नसकिरहेको भन्दै लाचारी व्यक्त गरेको एक नेताले बताए । उनका अनुसार अध्यक्ष प्रचण्ड आफैं असन्तुष्ट देखिए । पार्टी सचिवालय बैठक बस्नुपर्ने भन्दै गुनासो लिएर भेट्न गएका केन्द्रीय सदस्यहरुबीच अध्यक्ष प्रचण्ड आफैंले गुनासो फर्काएका छन् । पार्टीको केन्द्रीय सचिवालय बैठक समेत बस्न नसकिरहेको भन्दै उनले खोई किन हो आफूले पनि भन्न नसक्ने अवस्था दर्साएका थिए । एकजना नेताले भने त्यसपछि त हामीमा पनि दिक्दारी आएको छ उहाँले किन बैठकको टुंगो गर्न सक्नुभएन भन्ने बारमा हामीहरु पनि निकै दुःखी भएका छौँ ।
प्रचण्डको भनाइ उधृत गर्दै ती नेताले भने–तपाईंहरुका माग र गुनासा जायज नै छन् । अबको बैठकका एजेण्डा पनि यिनै हुन् । तर बैठक नै बस्न सकिरहेको छैन । प्रधानमन्त्रीको व्यस्तताले पनि होला । बैठक नै बस्न नसकिने, खै के खै के जस्तो भइरहेको छ । सोमवारै केन्द्रीय सचिवालय बैठक बस्ने भनिएको थियो । सो बैठकले केन्द्रीय सदस्यहरुको कार्यविभाजन तथा प्रदेश कमिटीहरुको टुंगो लगाउने भनिएको थियो । उता नेकपा नेताहरुले भने प्रधानमन्त्री तथा पार्टी अध्यक्ष केपी शर्मा ओलीले बैठक सार्ने गरेको आरोप लगाएका छन् । उता बुधबारै सार्वजनिक एक कार्यक्रमअनुसार नेकपा सचिवालयको बैठक बुधवार अपरान्ह ४ बजे बोलाइएको छ । तर पनि अन्तिम समयमा आएर भने प्रधानमन्त्रीको समय नमिलेमा बैठक स्थगित हुन सक्ने स्रोतले जनाएको छ ।
