पश्चिम रुकुम । बिहेको भोज खान पुगेका तीन जनाको मृत्यु भएको छ । मुसिकोट नगरपालिका–१२, जुम्लावाङका अम्मर विकको घरको बिहेमा भोज र रक्सी खाएर सुतेका तीन जनाको आइतबार राती नै मृत्यु भएको हो ।
मृत्यु हुनेमा रुकुम मुसिकोट नगरपालिका–११, भलाक्चा लहुँका कमानसिङ सार्की ,सानी भेरी गाउँपालिका–९का खम्बु कामी, र मुसिकोट नगरपालिका–१२, नयाँ गाउँका पलबहादुर विकको मृत्यु भएको प्रहरीले जनाएको छ।
आइतबार बिहेको भोजमा खाना र मदिरा सेवन गरेर बिहे भएकै घरमा सुतेका उनीहरू सोमबार बिहान मृत अवस्थामा फेला परेको हुन् । विषाक्त रक्सी सेवन गरेका कारण उनीहरूको मृत्यु भएको हुन सक्ने प्रारम्भिक अनुसन्धानबाट खुलेको प्रहरीले बताएको छ ।
सोमबार बिहानै वडा अध्यक्ष प्रेम ओलीले घटनाबारे प्रहरीलाई खबर गरेका थिए। एउटै कोठामा सुतेका पाँच मध्ये तीन जनाको मृत्यु भएको हो। ती तीन जनाले सेवन गरेको रक्सी र अरू दुई जनाले सेवन गरेको रक्सी फरक फरक पाइएको र घटनाबारे थप अनुसन्धान भइरहेको प्रहरीले बताएको छ।
