काठमाडौं । प्रधानमन्त्री केपी शर्मा ओलीले आइतबार संसदमार्फत देशवाशीलाई सम्बोधन गरे । उनले संसदमा सार्वजनिक वक्तव्य दिए र विदा हुन खोजे । तर विपक्षी काँग्रेसले प्रधानमन्त्रीलाई प्रश्न गर्न पाउनुपर्ने बताए । तर प्रश्न गर्न नपाएपछि नेपाली कांग्रेसका सांसदहरुले नाराबाजी गरे । उनीहरुले उठेर विरोध गरे र प्रधानमन्त्रीका कुरा चित्त नबुझेपनि प्रश्न गर्न पाउनुपर्ने जिकीर गरे र संसदजमा उठीरहे ।
आइतबार संसद बैठकको सुरुमा नै प्रधानमन्त्री ओलीले झण्डै एक घन्टा लामो सम्बोधन गरे । उनले सरकारको कामकारबाहीबारे जानकारी दिए र सरकारले धेरै राम्रो काम गर्दा पनि विपक्षीले राम्रो भन्न नसकेको गुनासो गरे ।
उनको सम्बोधन सकिएलगत्तै कांग्रेस सांसदहरुले प्रश्नउत्तर गर्न समय मागे । तर, सभामुख कृष्णबहादुर महराले प्रधानमन्त्रीले सरकारको कामकारबाहीबारे जानकारी मात्र दिएको भन्दै समय दिएनन् । कांग्रेस सांसदहरुले उभिएर विरोध गरेपछि सभामुख महराले ‘सिमित सदस्यलाई प्रश्न गर्न अनुमति दिन्छु’ भन्दै मिनेन्द्र रिजालको नाम लिए । तर, रिजालले महराको प्रस्ताव मानेनन् । उनले प्रश्न शुरु नगरेपछि लगतै सभामुखले प्रश्न गर्ने कार्यक्रम हटाएको सूचना दिए र अर्थ समितिका सभापति कृष्ण दाहाललाई निवृत्तिभरण कोषसम्बन्धी विधेयकको प्रतिवेदन पेश गर्न भने । त्यसपछि कांग्रेस सांसदहरुको नाराबाजी शुरु भयो । नाराबाजीकै बीचमा दाहालले प्रतिवेदन पेश गरे । तर त्यस लगत्तै बैठक स्थगित भएको छ ।