काठमाडौं । प्रमुख प्रतिपक्षी दल नेपाली कांग्रेसले एक साता भित्रै छायाँ सरकार गठन गर्ने भएको छ । सरकारले गरेको कामको निगरानी गर्न भन्दै कांग्रेसले सरकारमा बसिसकेका नेताहरुलाई लिएर छायाँ सरकार बनाउन लागेको स्रोतले जनाएको छ ।
कांग्रेस प्रमुख सचेतक बालकृष्ण खाँडका अनुसार कांग्रेसले एक साता भित्रै छायाँ सरकार बनाउने लागेको हो । खाँडले भने ‘एक साता भित्रै छायाँ सरकार गठन हुन्छ, अब सरकारका प्रत्येक कामको निगरानी छायाँ सरकारबाटै हुन्छ,’।
सांसद गगन थापाले तीन मन्त्रालय एक मन्त्री हुनेगरी छायाँ सरकार बनाइने र पहिले अनुभव लिइसकेका मन्त्रीहरु सम्वन्धित मन्त्रालय मातहत रहने जानकारी दिएका छन् । यस्तै ती मन्त्रीहरु मध्येबाट नै छायाँ सरकारको संयोजक बनाइने समेत जनाए ।
कांग्रेसले मंगलबार नै सुचना निकालेर छायाँ सरकारमा रहने मन्त्रीहरुको लागि नाम माग्ने तयारी गरेको छ । कांग्रेस स्रोतका अनुसार तीन दिनको समय दिएर छायाँ सरकारमा रहने सांसदहरुको नाम माग्ने र प्राप्त नामहरुबाट मन्त्री तोकेर छायाँ सरकारको जिम्मेवारी दिइने छ ।
