काठमाडौँ । सरकारसँग विगतमा भएका सहमति र्कायान्वयनको माग राख्दै अनशन सुरु गरेका डा. केसीको जीवन रक्षाका लागि नेपाल चिकित्सक संघले सरकारसँग माग गरेको छ । नेपाल चिकित्सक संघले आमरण अनसनरत डा. गोविन्द केसीको जीवन रक्षाका लागि विशेष पहल गर्न सरकारलाई आग्रह गरेको छ ।
डा. केसीले शुक्रबारदेखि इलाममा अनसन सुरु गरेका छन् । चिकित्सक संघले सहमति कार्यान्वयन गर्नुको साटो डा. केसीलाई चिढाउने गतिविधि गरेर सरकारले आफ्नो गरिमा र प्रतिष्ठामाथि आँच पुर्याएको ठहर गरेको छ ।
केसीले १६ औं पटक अनसन थालेका हुन् । यसरी यतिधेरै पटक अनसन बस्दा डा. केसीको शारीरिक अवस्था अत्यन्त कमजोर रहेको र जनुसुकै बेला अप्रिय घटना घट्नसक्ने भन्दै संघका महासचिव डा. लोचन कार्कीले जीवन रक्षाका लागि विशेष पहल गर्न माग गरेको हो ।
सो संघले शनिबार एक विज्ञप्ति प्रकाशन गरेर अनसनलाई सदाका लागि अन्त्य गर्ने सुनिश्चित वातावरण तयार गर्न पनि सरकारलाई आग्रह गरेको छ ।
