काठमाडौँ । कांग्रेस नेता मीनेन्द्र रिजालले प्रधानमन्त्री ओलीले आफ्नो सरकारबाट भए गरेका कामकाबारेमा दिएको विवरण सर्वथा झुटो भएको आरोप लगाएका छन् । उनले भने– प्रधानमन्त्रीले नै मुलुकलाई ढाँटेपछि के गर्ने ? उनले ब्यंग्य गर्दै भने– प्रधानमन्त्रीज्यू तपाईँको आफनो अभिव्यक्ति अरुलाई सुनाउनु भन्दा पहिले आफैँले ऐना अगाडि बसेर सुन्नुस्, त्यो कत्तिको झुठो छ तपाइँ आँफै थाहा पाउनुहुन्छ ।
प्रधानमन्त्री केपी शर्मा ओलीले पुस २२ गते संसदमा गरेको सम्बोधनमा पेश गरिएका तथ्य र तथ्याङ्क यथार्थ नभएको उनको भनाई थियो । प्रमुख प्रतिपक्षी दल नेपाली कांग्रेसले पनि सरकारको यो कार्यको आलोचना गरेको छ ।
आइतबार बसेको प्रतिनिधि सभाको बैठकमा विशेष समय लिएर डा.रिजालले राष्ट्रपतिका लागि सरकारले नयाँ गाडी र हेलिकप्टरको व्यवस्था गर्न लिएको निर्णयको पनि विरोध गरे । उनले विभिन्न माध्यमबाट आएका टिप्पणीप्रति असन्तुष्टि जनाउँदै यस्ता गतिविधिले लोकतन्त्र कमजोर हुने भन्दै सरकारमाथि प्रहार गरेका थिए ।
सरकारको निर्णयबाट १८ करोडकोे गाडी, डेढ अर्बको हेलिकप्टरमा चढाउने र पुरानो भन्दा पनि बढी भोगविलासीतर्फ नयाँ दरबारलाई लान खोजिएको उनको आरोप थियो । उनले भने– यसरी गणतन्त्र बलियो हुँदैन, नेपाल जे छ, जस्तो छ जनताको आर्थिक अवस्था जस्तो छ त्यहि सुहाउँदो राष्ट्रपतिलाई सुविधा दिनुपर्छ ।
जनताले भोकभोकै बसेर राष्ट्रपतिलाई बिलासी बनाउने पक्षमा नेपाली जनता छैनन् । उनले भने– प्रधानमन्त्रीज्यू राष्ट्रपति निवास शीतल निवासलाई नयाँ दरबार नबनाउँ ।
