काठमाडौं । म्यान्चेस्टर युनाइटेडले इंग्लिस प्रिमियर लिग फुटबलमा टोटनह्यामलाई पराजित गरेको छ ।
आइतबार राति भएको खेलमा युनाइटेडले टोटनह्यामलाई उसैको घरेलु मैदानमा १–० गोल अन्तरले पराजित गरेको हो । युनाइटेडको जितमा मार्कुस राष्फोर्डले निर्णायक गोल गरे । उनकै एक मात्र गोलमा युनाइटेड विजयी भएको हो ।
४४औं मिनेटमा राष्फोर्डले गोल गर्दै युनाइटेडलाई अग्रता दिलाएका थिए । पहिलो हाफमा १–० गोलको अग्रता बनाएको म्यान्चेस्टर युनाइटेडले दोस्रो हाफमा पनि अग्रतालाई कायमै राख्दै जित निकाल्न सफल भयो ।
जितसँगै म्यान्चेस्टर युनाइटेडले २२ खेलबाट ४१ अंक बनाएको छ । युनाइटेड लिगको छैटौ स्थानमा छ । यता टोटनह्याम भने युनाइटेडसँग पराजित मात्रै भएन लिगको दोस्रो स्थानमा उक्लिने अवसर पनि गुमायो । पराजित टोटनह्यामको २२ खेलबाट ४८ अंक रहेको छ ।
लिगको दोस्रो स्थानमा रहेको म्यान्चेस्टर सिटीको ५० अंक रहेको छ । त्यस्तै लिगको शीर्ष स्थानमा रहेको लिभरपुलको भने समान खेलबाट ५७ अंक छ ।
