काठमाडौँ । विवेकशील साझा पार्टीकी नेतृ रञ्जु दर्शनाको चरित्र हत्या हुने गरी समाचार प्रकाशित गरेको भन्दै प्रहरीले थप एक जनालाई पक्राउ गरेको छ ।
बिहिबार महानगरीय अपराध महाशाखा टेकुबाट खटिएको टोलीले गोरखाको गण्डकी गाउँपालिका–३ निवासी क्यापिटल हेडलाइन डटकमका सम्पादक २७ वर्षीय सुमन अधिकारीलाई काठमाडौँको नयाँबजारबाट पक्राउ गरेको हो ।
अधिकारी सम्पादक रहेको क्यापिटल हेडलाइन,मुक्ति खबर र नेपाल टक डटकम सहितका केही अनलाइनले नेतृ रञ्जुमाथि कार्यालयमै विवेकशील साझा पार्टीका संयोजक रवीन्द्र मिश्रले बलात्कार गर्न खोजेको झुटो समाचार प्रकाशित गरेका थिए ।
आफ्नो चरित्र हत्या गर्ने गरी समाचार प्रकाशित भएपछि रञ्जुले विभिन्न पाँचवटा अनलाइनविरुद्ध साइबर क्राइम अन्तरगत महाशाखामा उजुरी दिएकी थिइन् । महाशाखा प्रमुख एसएसपी धीरजप्रताप सिंहका अनुसार यअसघि मुक्त मिडिया प्रालि र नेपाल टक डटकमकका सञ्चालक सिन्धुपाल्चोकको मेलम्ची–३ का २४ वर्षीय श्याम रोकालाई पक्राउ गरिसकेको छ ।
