काठमाडौं । जनमुक्ति सेनाबाटबहिर्गमनमा परेका माओवादी नेताहरुले पुनः युद्धमा जान सकिने संकेत गरेका छन् ।
आज काठमाडौँको माईतिघरमा आयोजित बिरोध प्रदर्शनमा जनमुक्ति सेना नेपालका महासचिव राजन थापा (सुवास) ले आफुहरुलाई विदेशीको इराशारामा अयोग्यको विल्ला भिराइएको भन्दै आफुहरुका माग सम्बोधन नभए पुनः युद्धमा जाने चेतावनी दिएका हुन् ।
थापाले आफुहरुलाई सरकारी पक्षबाट नै अपमान गरेका कारण जुनसुकै बेला पनि आफुहरु हतियार उठाउन सक्ने चेतावनी दिएका हुन् । उनले पटकपटक प्रचण्ड सरकारमा जादाँपनि आफुहरुको मागप्रति चासो नदिएको भन्दै आक्रोश पोखेका हुन् । उनले यसरी नै सरकारी पक्षबाट आफुहरु अपहेलित भए चुप बस्न नसक्ने बताएका हुन् ।
१० वर्षे सशस्त्र जनयुद्ध लडेका जनमुक्ति सेनालाई आजकै दिन (माघ १० गते) अयोग्य घोषित गरी अपमानजनक रुपमा निष्कासित गरेको भन्दै कालोपट्टी र व्यानरसहित प्रदर्शन उत्रेका कार्यकर्ता र नेताहरुले पूर्वलडाकुहरुलाई लगाइएका अयोग्यको विल्ला तत्काल खारेज गर्नुपर्ने, स्वेच्छिक अवकास लिएका जनमुक्ति सेना सरह राहात प्याकेज उपलब्ध गराउनु पर्ने, जन–आन्दोलनको क्रममा घाइते भएका, अपाङ्ग भएकाहरुलाई दीर्घकालीन व्यवस्थापन गर्नुपर्ने लगायत उनीहरुले १८ बुँदे माग राखेका छन् ।
