काठमाडौं । अन्ततः प्रमुख विपक्षी नेपाली कांग्रेसले सरकारका विरुद्धमा सडक आन्दोलन गर्ने भएको छ । काँग्रेसको आज बसेको केन्द्रीय समितिले यस्तो निर्णय गरेको हो । सरकारले एकपछि अर्काे गर्दे लोकतन्त्रविरोधी काम गरेको, विपक्षीलाई विश्वासमा लिन नसकेको, गिरिजा प्रसाद कोइराला र सुशिल कोइरालाका नाममा स्थापना भएका अस्पताललाई पनि स्थानीय स्तरमा सञ्चालनको मात्र व्यवस्था गर्न लागेको तथा हालै भएको संवैधानिक परिषदको बैठकमा विपक्षी दलको नेताको अनुपस्थितिमा नै आफूखुशी निर्णय गरेको अरोप काँग्रेसको छ ।
सो पार्टीको आज बसेको बैठकले चारबुँदे निर्णय गरेको छ, जसमा सरकारसँगै सभामुखमाथि समेत प्रश्न उठाइएको छ । कांग्रेसका नेताद्धय गिरिजाप्रसाद कोइराला र सुशील कोइरालाको नाममा स्थापना भएका दुई अस्पताललाई सरकारले विघटनको संघारमा पु¥याएको आरोप लगाएको छ । सरकारले राजनीतिक पूर्वाग्रहबाट प्रेरित भएर यो काम गरेको आरोप काँग्रेसको छ । बैठकको निर्णयमा भनिएको छ, सरकारले आफ्नो गलत एवं पूर्वाग्रही निर्णय तत्काल सच्याओस् ।’
सभामुखले संसदीय परम्परा र मर्यादा अनुरुप सहमतिबाट निकास नखोजेको कांग्रेसको आरोप छ ।
कांग्रेसले सत्याग्रही डा. गोविन्द केसीको जीवन रक्षाप्रति गम्भीर बन्न सरकारलाई सचेत गराएको छ । भोलिको संसद बैठकमा डा. केसीसँग सरकारले गरेको सम्झौताविपरित चिकित्सा शिक्षा विधेयक पारित गराउने काम बलजफ्ती गरेमा आइतबार शनिबार बस्ने काँग्रेसको केन्द्रीय समितिले सडक आन्दोलनका चरणबद्ध कार्यक्रमहरु घोषणा गर्ने जनाइएको छ ।
