काठमाडौँ । नेपाल प्रहरी केन्द्रीय अनुसन्धान ब्यूरोले नक्कली ब्लु बुक बनाई बैँकबाट कर्जा लिएर रु दुई करोड ७१ लाख ७६ हजार ठगी गर्ने आठजनालाई पक्राउ गरेको छ ।
ब्यूरोको टोलीले देव विकास बैँकका विभिन्न शाखाबाट सवारी कर्जा लिने प्रयोजनका लागि सम्बन्धित शाखा कार्यालयको कर्मचारी र मुल्याङ्कनकर्तालाई सवारी देखाई ठगी गर्ने आठजनालाई पक्राउ गरी आज सार्वजनिक गरेको हो ।
पक्राउ पर्नेमा काभ्रेपलाञ्चोकका ऋणी ३६ वर्षीय नारायण श्रेष्ठ, ३० वर्षीय बालकृष्ण श्रेष्ठ, ३४ वर्षीय चेतबहादुर श्रेष्ठ, २६ वर्षीय विकास श्रेष्ठ, ३२ वर्षीय नविन श्रेष्ठ, ४२ वर्षीय कृष्णबहादुर खत्री, मूल्याङ्कनकर्ता पर्साका नरेशमान सिंह अमात्य र बैँकका शाखा प्रबन्धक काठमाडौँका सरिन शंकर श्रेष्ठ रहेका छन् ।
ब्यूरोका प्रवक्ता उमाप्रसाद चर्तुवेदीले यातायात कार्यालयबाट प्राप्त प्रतिलिपी ब्लु बुकमा गलत विवरण सहित सहि छाप गरी सुरक्षण स्वरुप बैँकमा धितो राखी विभिन्न ११ वटा ऋणीको नाममा नक्कली कागजात बनाएर ठगी गरेको बताए ।
पक्राउ परेकालाई बैकिङ कसूर तथा सजाय ऐन, २०६४ तथा मुलुकी ऐन सरकारी छाप दस्तखत किर्ते कागजको महल बमोजिम अनुसन्धान गरिरहेको ब्यूरोले जनाएको छ ।
