सुर्खेत । नेपाल कम्युनिष्ट पाटी (नेकपा) का प्रदेश इञ्चार्ज जनार्दन शर्माले बलियो कम्युनिष्ट पार्टीले मात्र कर्णाली समृद्ध बनाउन सक्ने बताएका छन् ।
आज आयोजित ‘जनप्रतिनिधि तथा अगुवा कार्यकर्ता भेला’ कार्यक्रममा बोल्दै प्रदेश इञ्चार्ज शर्माले विगतको गुटगत मानसिकतालाई भत्काएर अघि बढ्न पार्टी नेतृत्व तथा कार्यकर्तालाई निर्देशन दिएका छन् । उनले गुटगत प्रवृतिलाई अन्त्य गरेमात्रै कम्युनिष्टहरु बलियो हुने बताएका छन् ।
उनले स्वार्थ र गुटगत प्रवृतिको कारण प्रमुख प्रतिपक्षी दल नेपाली काँग्रेस सकिन लागेको भन्दै त्यस्तो अबस्थामा नपुग्न स्वार्थ र गुटगत राजनितिक त्याग्नु पर्नेमा जोड दिएका हुन् ।
“बलियो कम्युनिष्ट पार्टीले मात्र कर्णाली समृद्ध बनाउन सक्छ”, इञ्चार्ज शर्माले भने, “समाजवादमा लैजान नयाँ कम्युनिष्ट पार्टी निर्माण भएको हो ।”
सो कार्यक्रममा सचिव मायाप्रसाद शर्मा, कर्णाली प्रदेशका मुख्यमन्त्री महेन्द्रबहादुर शाही, केन्द्रीय तथा प्रदेश सदस्य, नेकपाका नेता तथा कार्यकर्ताको सहभागिता रहेको थियो ।
