काठमाडौं । प्रहरीलाई झुट्टो खबर दिएको आरोपमा एक जना पक्राउ परेका छन् । पक्राउ पर्नेमा स्याङ्जा घर भई हाल काठमाडौँ बसिरहेका तिलकराम अधिकारी रहेका छन् ।
अधिकारीलाई बुधवार गोंगवुमा रहेको रियल टाईगर टुर्स एण्ड ट्राभल्सकी सञ्चालिका डेजिना बस्नेतले ८ लाख १५ हजार रुपैयाँ बैंकमा जम्मा गर्न पठाएकी थिइन् ।
तर, अधिकारीले बुधबार मध्यान्ह साढे १ बजेतिर केही ब्यक्तिले बन्दुक देखाएर, नशालु पदार्थ समेत सुँघाएर नगद लुटेर फरार भएको भन्दै ट्राभल्समा जानकारी गराएका थिए । रकम लुटिएको खबर पाउन साथ महानगरीय अपराध महाशाखाले छानबिन गर्दा खबर झुट्टो भएको खुलेको थियो ।
प्रवक्ता (एसपी) नरेन्द्र उपे्रतीले भने, ‘अनुसन्धान गर्दै जाँदा अधिकारीले सामाखुसीस्थित अमृत डुम्रेको कोठामा उक्त रकम लुकाएको खुलेको छ’ । प्रहरीका अनुसार डुम्रे अधिकारीको साथि रहेका र अधिकारी र डुम्रेकै मिलेमहत्तो देखिएको उप्रेतीले बताए ।
हाल घटनामा संग्लग्न अमृत डुम्रे भने फरार रहेका छन् । उनको खोजी कार्य भइरहेको अपराध महाशाखाले जनाएको छ ।
