काठमाडौं । पाँच खेलको एक दिवसीय क्रिकेट सिरिजमा भारतले न्युजिल्यान्डलाई ४–१ ले जितेको छ ।
आइतबार सम्पन्न सिरिजको अन्तिम खेलमा भारतले न्युजिल्यान्डलाई ३५ रनले पराजित गरेको हो ।
२५३ रनको लक्ष्य पछ्याउँदै ब्याटिङ गरेको न्युजिल्यान्डले ४४.१ ओभरमा सबै विकेटको क्षतिमा २१७ रन मात्रै बनाएको थियो । न्युजिल्यान्डका जेम्स निशामले ४४ र कप्तान केन विलियमसनले ३९ रन बनाए । भारतका लागि युजवेन्द्र चाहलले तीन विकेट लिए ।
यसअघि वेलिङटनमा टस जितेर पहिले ब्याटिङ गरेको भारतले निर्धारित ओभर सकिन एक बल बाँकी छदा सबै विकेटको क्षतिमा २५२ रन बनाएको थियो । भारतका लागि अम्बटी रायडुले ९० रन बनाए । त्यस्तै विजय शंकर र हार्दिक पाण्ड्याले समान ४५–४५ रन बनाए ।बलिङतर्फ न्युजिल्यान्डका मट हेनरीले चार विकेट लिएका थिए ।
