मस्को । युक्रेन युद्धका कारण रुसी राष्ट्रपति भ्लादिमिर पुटिनको लोकप्रियता फेरि उचाइमा पुगेको छ ।
एक सरकारी एजेन्सीद्वारा गरिएको पछिल्लो सर्वेक्षणअनुसार रुसमा युक्रेन युद्धका बारेमा छिटपुट विरोधका बीच ६५ प्रतिशत रूसी जनताले युक्रेनमा पुटिनको ‘विशेष सैन्य अपरेशन’ लाई अनुमोदन गरेका छन् ।
यति मात्र होइन अर्को स्थानीय सर्वेक्षणमा ७१ प्रतिशतले पुटिनप्रति विश्वास व्यक्त गरेका छन् । युक्रेन युद्ध सुरु हुनुअघि पुटिनमाथि रुसी जनताको विश्वास ६० प्रतिशत मात्रै थियो ।
सेन्ट पिटर्सबर्गका ट्याक्सी चालक लीले एसिया टाइम्सलाई भने, “पुटिनले जे गरिरहेका छन् ठीकै छन्। युक्रेनले हामीलाई कुनै विकल्प छोडेन। हामीले डोनबास क्षेत्रमा रुसी जनताको नरसंहार रोक्नुपर्यो ।”
रुसले युक्रेनमा गरेको आक्रमणको एकातिर पश्चिमा राष्ट्रहरुले निन्दा गरिरहेका छन् भने रुसी राष्ट्रपतिले यस सैन्य कारबाहीमा आफ्नो देशको ठूलो जनसङ्ख्याको समर्थन पाइरहेका छन् ।
रुसी राष्ट्रपति कार्यालयले पुटिनले विशेष सैन्य कारबाही गरेर युक्रेनका जनतालाई फासीवादी सरकारबाट मुक्त गराउने काम गरिरहेको दाबी गरेको छ ।
‘रुसले युद्ध सुरु गरेको होइन, अन्त्य गरिरहेको छ’
रुसका जनताले क्रेमलिनको यो दाबीलाई समर्थन गरेको देखिन्छ ।
रुसी सरकारी एजेन्सीले गरेको सर्वेक्षणले युक्रेनमा कारबाही गरेर रुसले डोनबास क्षेत्रमा रुसी भाषा बोल्ने जनताको सुरक्षा गरिरहेको रुसी जनताको विश्वास रहेको पनि खुलासा भएको छ ।
रुसी विदेश मन्त्रालयकी प्रवक्ता मारिया जाखारोभाले भनिन्, “रुसले युद्ध सुरु गरेको होइन । उसले यसलाई पूरा गर्दैछ ।” यही कारण युद्धपछि पुटिनको लोकप्रियता ६० प्रतिशतबाट बढेर ७१ प्रतिशत पुगेको छ ।
यसअघि क्रिमियालाई युक्रेनबाट अलग गरेपछि पनि रुसमा पुटिनको लोकप्रियता निकै बढेको थियो । त्यसबेला पनि रुसले क्रिमियाका रुसी जनतालाई किभ सरकारबाट रक्षा आवश्यक छ भनी देखाउने प्रयास गरेको थियो ।
यसपछि रुसी जनता देशको झण्डा बोकेर सडकमा उत्रिए र पुटिनको लोकप्रियता उकालो लाग्न थाल्यो ।
आज युक्रेनमा युद्धको १४ औँ दिन हो र त्यहाँ दुई पक्षबीच युद्धविरामका सम्बन्धमा उनीहरूको अडानमा केही नरम भएको देखिन्छ।
युक्रेनका राष्ट्रपतिले आफ्नो देश नेटोमा सामेल नहुने घोषणा गरेका छन् । यो रुसको प्रमुख माग पनि थियो ।
