विप्लवमाथि प्रतिबन्धबारे मलाई थाहा छैन– देउवा

पाल्पा । नेपाली कांग्रेसका सभापति तथा पूर्वप्रधानमन्त्री शेरबहादुर देउवाले नेत्रविक्रम चन्द (विप्लव) नेतृत्वको नेकपामाथिको सरकारले लगाएको प्रतिबन्धबारे आफूलाई थाहा नभएको बताएका छन् ।
उनले भने– यस विषयमा मलाई केही थाहा छैन, सरकारले सोधेको पनि छैन । उक्त समूहमाथि प्रतिबन्ध लगाउने विषयमा देउवाले सहमति दिएको भनी समाचारहरु सार्वजनिक भएपछि आज देउवाको यो भनाई आएको हो ।
प्रेस युनियन पाल्पा शाखाले शनिबार आयोजना गरेको पत्रकार सम्मेलनमा उनले विप्लवलाई सहमतिमा ल्याउन सरकारले वार्ता गर्नुपर्ने बताए । उनले उक्त पार्टीलाई हत्याहिंसा छोडेर वार्तामा आउन आग्रह पनि गरेका छन् ।
नेपाली कांग्रेसले देशलाई हिन्दु राष्ट्र घोषणा गर्नुपर्ने पक्षमा के गर्ला भन्ने सञ्चारकर्मीकोे प्रश्नमा देउवाले संविधानमा जे व्यवस्था छ त्यसैलाई कांग्रेसले मान्ने बताए ।
सभापति देउवाले कांग्रेस पूर्वसभापति गिरिजाप्रसाद कोइरालाले धर्म निरपेक्षताको नेतृत्व गरेको स्मरण गर्दै त्यसैले शेखर र शशांक कोइरालाले हिन्दु राष्ट्रका पक्षमा आवाज उठाउन नहुने धारणा राखे । उनीहरु बोलेर केही नहुने देउवाको धारणा थियो ।
वर्तमान सरकारले नेपालको प्रेसमाथि अंकुश लगाउने कार्य गर्न खोजेको उनको दाबी थियो । यस्तो कार्य सहन नसकिने सभापति देउवाले बताए ।