काठमाडौं । सरकारले बजेटमार्फत सरकारी कर्मचारीको तलब बढाएको छ । बुधबार संसदमा आर्थिक वर्ष २०७६/७७ को बजेट पेश गर्दै अर्थमन्त्री डा. युवराज खतिवडाले कर्मचारीको तलववृद्धि गरेका हुन् ।
सरकारले विभिन्न पदमा फरक-फरक अनुपातमा आधारभूत तलब बढाएको छ । नायव सुब्बासम्म २० र त्यसमाथि १८ प्रतिशत तलब बृद्धिको घोषणा भएको हो । अब सबैभन्दा तल्लो तहका पियनले न्यूनतम २२ हजार ८ र माथिल्लो तहका मुख्यसचिवले ६५ हजार १३६ रकम पाउनेछन् ।
सरकारले खेलकुदलाई ३ अर्ब ९९ करोड बजेट विनियोजन गरेको छ । यो अघिल्लो वर्षको भन्दा १ अर्ब ९५ करोड बढि हो ।
काठमाडौं उपत्याकामा अन्तर्राष्ट्रिय खेलकुद परिसरको निर्माण गर्न प्रारम्भिक अध्ययन गरिने, सबै प्रदेश र स्थानीय तहमा प्रदेशस्तरको रंगशाला, खेलग्रामको निर्माण गरिने बजेट भाषणमा उल्लेख छ । त्यस्तै, निर्माणाधिन अवस्थामा रहेको मुलपानी क्रिकेट मैदान सम्पन्न गर्न १० करोड बजेट विनियोजन गरेको अर्थमन्त्री डा. खतिवडाले बताएका छन् । दुई वर्षमा निर्माण सम्पन्न गर्ने सरकारको लक्ष्य छ ।
त्यस्तै, सरकारले १३ औं दक्षिण एसियाली खेलकुद प्रतियोगिता र नवौं राष्ट्रिय खेलकुद प्रतियोगिताको लागि पनि बजेट छुट्याएको छ । क्रिकेट एकेडमी निर्माणदेखि निजी क्षेत्रलाई खेलकुदमा आबद्ध गर्न सरकारले प्रोत्साहन गर्ने उल्लेख गरेको छ ।
राष्ट्रिय गौरवका तीनसहित हवाई आयोजनामा प्राथमिकताका साथ बजेट विनियोजन गरेको छ । सबै गरी हवाई आयोजनामा पौने १६ अर्ब बजेट विनियोजन भएको छ ।
संसदमा अर्थमन्त्री युवराज खतिवडाले पेश गरेको बजेटमा हवाई क्षेत्रलाई १५ अर्ब ८५ करोड बजेट छुट्याइएको छ ।
चालु आवमा हवाई पूर्वाधारका लागि १९ अर्ब ३५ करोड रुपैयाँ छुट्याइएको थियो ।
राष्ट्रिय गौरवका २१ आयोजनामध्ये भैरहवास्थित गौतमबुद्ध अन्तर्राष्ट्रिय विमानस्थल र पोखरा क्षेत्रीय अन्तर्राष्ट्रिय अहिले भौतिक प्रगतिका हिसावले अगाडी छन् ।
यसमध्ये सरकारले गौतमबुद्ध विमानस्थलका लागि ३ अर्ब ३४ करोड बजेट छुट्याएको छ । पोखरा विमानस्थलका लागि ८ अर्ब रुपैयाँ छुटयाईएको छ ।
सरकारले दोस्रो अन्तरराष्ट्रिय विमानस्थललाई पनि बजेटमा निरन्तरता दिएको छ । बजेटमा बैकल्पिक आन्तरिक विमानस्थल बनाउने पपिन घोषणा गरेको छ ।
सरकारले राजमार्गमा हवाइजहाज अवतरण गराउने योजनालाई बजेटमा समावेश गरेको छ । नीति तथा कार्यक्रममा सरकारले पहिलो पटक यो अवधारणालाई अघि सारेको थियो ।
आकस्मिक अवस्थामा राजमार्गको दायाँ(बाँयाको भाग खाली गराई जहाज अवतरण गराउन सक्ने गरी व्यवस्था मिलाइने घोषणा अर्थमन्त्री डा युवराज खतिवडाले गरे ।
यसका लागि सम्भाब्यता अध्ययन गरिने उनले उल्लेख गरेका छन् । सरकारले बनाउने सबै सडकहरु दुई लेनको बनाउने र सम्भाब्यताका आधारमा राजमार्गमा आकस्मिक हवाई अवतरण गर्न सक्ने व्यवस्था मिलाउने उनको भनाइ छ । तर, विज्ञहरु यस प्रकारको सम्भावना नेपालमा नदेखिएको बताउँछन् ।
