काठमाडौं । भारतीय क्रिकेट खेलाडी युवराज सिंहले क्रिकेट करिअरबाट सन्यासको घोषणा गरेका छन् ।
युवराज सिंहले नयाँ दिल्लीमा कार्यक्रम गर्दै सन्यासको घोषणा गरेका हुन् । सन् २०११ को विश्वकप भारतले जित्दा प्लेयर अफ द टुर्नामेन्ट घोाषित भएका युवराज पछिल्लो समयमा टिम बाहिर थिए । विश्वकप २०१९ खेलेर सन्यास लिने तयारीमा रहेको युवराज टिममा परेका थिएनन् ।
क्रिकेटलगायत सिनेमा जगतका व्यक्तित्वले युवराजलाई नयाँ इनिङका लागि बधाई दिँदै उनका शानदार यात्रालाई याद गरे । युवराजलाई बधाई दिनेमा अनुष्का शर्मा, वरुण धवन, अनुपम खेरजस्ता सेलिब्रिटी समावेश छन् । साथै, उनकी पूर्व प्रेमिका किम शर्माले पनि युवराजलाई नयाँ इनिङको बधाई दिइन् ।
युवराज सिंहको अवकाशमा उनकी श्रीमती हेजेलले इन्स्टाग्राममा पत्रकार सम्मेलनका बेला खिचिएको युवराज सिंहको एउटा तस्बिर सेयर गर्दै क्याप्सनमा लेखे, ‘र यससँगै एउटा युगको अन्त्य भएको छ । तपाईंले आफैंलाई गर्व गर्नुपर्छ । अब अर्को अध्यायतर्फ बढ्छौं । धेरै माया ।’ किम शर्माले लेखिन्, ‘सधैं चम्किरह, मायालु जोडी ।’
हेजलको पोष्टमा कमेन्ट गर्दै बलिउडका विभिन्न सेलिब्रिटीले युवराजलाई बधाई दिए । स्मरण रहोस्, किम शर्मा र युवराज सिंह लामो समयसम्म सम्बन्धमा थिए । यी दुईको विवाहसमेत हुने चर्चा थियो तर युवराजकी आमाले उनीहरुको सम्बन्ध अस्विकार गरेपछि यी दुईबीच दरार आएको थियो ।
अनुष्का शर्माले युवराजको पोष्टमा उनलाई वारियर ९योद्धा० भनिन् । अनुष्काले सबै यादका लागि धन्यवाद दिँदै उनलाई एक योद्धा र मानिसहरुको लागि प्रेरणा बताए ।
यस्तै, नायक वरुण धवनले ट्वीटरमा युवराजको एउटा तस्बिर सेयर गर्दै युवराजलाई राम्रो याद दिलाएको र खेलका महान एम्बेसडर रहनका लागि धन्यवाद दिए ।
सन् २०१७ मा इंग्ल्यान्डविरुद्ध उनले लाष्ट टी–२० क्रिकेट खेल खेलेका थिए । त्यसयता उनी टिममा पर्न असफल हुँदै आएका थिए । उनले भारतीय टिमबाट ३०४ एकदिवसीय खेलमा ८ हजार ७०१ रन बनाएका छन् ।
युवराजले आफ्नो एकदिवसीय करिअरमा १४ शतक र ५२ अर्शतक बनाएका छन् । त्यस्तै, ५८ टी२० क्रिकेट खेलमा एक हजार १७७ रन बनाउँदा ८ अर्धशतक बनाएका छन् । यता, टेष्ट क्रिकेटमा युवराजले ४० खेलबाट एक हजार ९०० रन बनाउँदा तीन शतक र ११ अर्धशतक बनाएका छन् ।
युवराज त्यस्ता खेलाडी हुन् जसले क्यान्सर जस्तो रोगलाई पनि जित्दै आफ्नो क्रिकेट करिअरमा फर्किन सफल भए ।
