बर्दिया । जिल्ला प्रशासन कार्यालय बर्दियाले दाङ घोराहीस्थित सगरमाथा सिमेन्ट उद्योगीलाई ७ लाख जरिवाना तिराएको छ ।
घोराहीमा उत्पादित सिमेन्ट उद्योगका सञ्चालक, निर्देशक र व्यवस्थापकलाई कालोबजारी ऐनअन्तर्गत ७ लाख जरिवाना लिइएको हो ।
उद्योगका सञ्चालक पुरुषोत्तम संघाईलाई ३ लाख, निर्देशक सञ्जय वंशल र व्यवस्थापक आदित्य संघाईलाई जनही २ लाख जरिवाना गरेको प्रमुख जिल्ला अधिकारी रामबहादुर कुरुम्बाङले जनाए ।
नेपाल गुणस्तर तथा नाप तौल विभाग, बालाजु काठमाडौंबाट गएको टोलिले उक्त सिमेन्टमा गुणस्तर नभएको प्रमाणित गरेको थियो । गुणस्तर तथा नापतौल विभागमा परीक्षण गर्दा म्यानिसिया (खरानी) बढीमा ५ प्रतिशत हुनु पर्नेमा ६ दशमलव ५ प्रतिशत बढी भएको प्रशासनले जनाएको छ ।
सिमेन्ट ल्याब रिर्पोटबाट गुणस्तर नभएको प्रमाणित भई आएपछि कालो बजार तथा केही सामाजिक अपराध ऐन २०३२ अन्तर्गत कारवाही प्रक्रिया अघि बढाइएको थियो ।
करिब छ महिनाअघि जिल्ला प्रशासन कार्यालयले उद्योगका सञ्चालकलाई २३ लाख धरौटी लिई तारेखमा छाडेको थियो ।
यस्तै करिब ८ महिनाअघि सगरमाथा सिमेन्ट कमसल र गुणस्तर देखिएपछि जिल्लास्थित विकास आयोजना लगायत सरकारी कार्यालयमा सगरमाथा ओपीसी सिमेन्ट प्रयोग नगर्न जिल्ला प्रशासन कार्यालय, बर्दियाले उर्द्दी जारी गरेको थियो ।
नेपाल सरकारबाट गुणस्तर चिह्न प्राप्त गरेको दाङबाट उत्पादित सगरमाथा सिमेन्ट लेखिएको उक्त सिमेन्ट विजय ट्रेडर्सबाट वितरण हुँदै आएको छ ।