काठमाडौं । विश्वकप क्रिकेट प्रतियोगितामा विश्वविजेता श्रीलंकामाथि अष्ट्रेलियाको सहज जित हात पारेको छ ।
शनिबार राति भएको खेलमा अष्ट्रेलियाले श्रीलंकालाई ८७ रनले पराजित गरेको हो । ३३५ रनको चुनौती पछ्याउँदै ब्यािटङ गरेको श्रीलंकाले ४५.५ ओभरमा सबै विकेटको क्षतिमा २४७ रन मात्रै बनायो ।
श्रीलंकाका लागि कप्तान दिमुख करुनरत्नेले ९७ रन बनाए । उनले कुशल परेरासँग मिलेर पहिलो विकेटका लागि ११५ रनको साझेदारी गरेका थिए । कुशलले ३६ बलमा ५ चौका र एक छक्का प्रहार गर्दै ५२ रन बनाए । तर अन्य खेलाडीले राम्रो स्कोर बनाउन सकेनन् ।
बलिङतर्फ मिचेल स्टार्कले चार विकेट लिए । त्यस्तै केन रिचार्डशनले तीन र पट कुम्मिन्सले दुई विकेट लिए ।
यसअघि टस हारेर पहिले ब्याटिङ गरेको अष्ट्रेलियाले निर्धारित ५० ओभरमा सात विकेटको क्षतिमा ३३४ रन बनाएको थियो । अष्ट्रेलियाका लागि कप्तान आरोन फिन्चले उत्कृष्ट प्रदर्शन गर्दै शतकसहित १५३ रन बनाए । उनले १३२ बलको सामना गर्दै १५ चौका र ५ छक्का प्रहार गरे । त्यस्तै, स्टिेभन स्मिथले ७३ रन बनाउँदा ग्लेन म्याक्श्वेल ४६ रनमा अविजित रहे ।
बलिङतर्फ श्रीलंकाका इसुरु उदना र धनन्जय डे सिल्भाले समान २–२ विकेट लिए ।