ब्राजिल । लियोनेल मेस्सीको कप्तानीमा रहेको अर्जेन्टिना कोपा अमेरिका फुटबल प्रतियोगिता अन्तर्गतको आफ्नो पहिलो खेलमा कोलम्बियासँग २–० गोल अन्तरले पराजित भएको छ ।
समुह बी अन्तर्गत आज बिहान भएको भएको पहिलो खेलमा अर्जेन्टिना कोलोम्बियासँग २–० गोलले पराजित भएको हो । कोलोम्बियाको लागि रोजर मार्टिन्ज र डुभान जापाटले एक एक गोल गरेका थिए ।
पहिलो हाफ बराबरी खेलेको अर्जेन्टिनाले दुबै गोल दोस्रो हाफमा खाएको हो । निकै नै कमजोर खेल प्रर्दशन गरेको अर्जोन्टिनाले पाएको मौकालाई सदुपयोग गर्न सकेन। खेलको ७१ औं मिनेटमा नै अर्जोन्टिनाले गोल खायो । कोलोम्बियाका रोजर मार्टिनलेअर्जेन्टिनाका दूईजना डिफेन्डरलाई बिट गर्दै बक्स लाइनबाट हानेको प्रहारले सोझै जाली चुमेपछि कोलम्बियाले खेलमा १–० ले अग्रता लियो ।
पहिलो गोल गरेपछि निकै नै आक्रमक खेल खेलेको कोलोम्बियाले ८६ मिनेटमा अर्के गोल गर्यो । उसका लागि बैकल्पिक रुपमा मैदान पसेका डुभान जापाटले अर्के गोल गर्दै अग्रता २–० पुर्याए । बाँकी समयमा अर्जेन्टिनाले गोल गर्न नसक्दा कोलोम्बियाले २–० को जित हात पारेको हो ।
यससँगै कोलम्बियाले समूह ‘बी’मा पहिलो खेल जितेर ३ अंक बटुलेको छ । पराजित अर्जेन्टिना सबैभन्दा पुच्छारमा छ ।
विगत २० वर्षमा पहिलो पटक कोलम्बियासँग अर्जेन्टिना पराजित भएको हो ।खेलमा पराजित भएपछि प्रतिक्रिया दिँदै मेस्सीले कोलम्बियासँग पराजित हुँदा दुःख लाग्नु स्वाभाविक भएको बताए । उनले अर्जेन्टिनाले गोल गर्ने अवसर पाएको तर त्यसलाई गोलमा परिणत गर्न नसकेको बताए ।
अर्जेन्टिनी टिममा विश्वप्रसिद्ध फुटबल खेलाडी रहेका छन् । स्पेनी क्लब बार्सिलोनाका फर्वार्ड समेत रहेका मेस्सी सहित म्यान्चेस्टर सिटीका फर्वार्ड सर्जियो अग्वेरो र पेरिस सेन्ट जर्माइनका फर्वार्ड एन्जेल डी मारिया पनि अर्जेन्टिनी अग्रपंक्तिमा थिए । खेलपछि अग्वेरोले हामीले यस्तो शुरुआत चाहेका थिएनौं भने । अर्जेन्टिनी आक्रमणलाई कोलम्बियाका गोलरक्षक डेभिड ओस्पिनाले निस्तेज पारेका थिए ।
कूल १२ टिम सहभागी रहेको कोपा अमेरिका फुटबल प्रतियोगिता अन्तर्गत समूह ख मा अर्जेन्टिना सहित कोलम्बिया, पाराग्वे र कतार रहेका छन् । समूह क मा भने ब्राजिल, पेरु, भेनेजुएला र बोलिभिया तथा समूह ग मा उरुग्वे, चिली, जापान र इक्वेडर रहेका छन् ।
कोपा अमेरिका फुटबल प्रतियोगिता यो सहित ब्राजिलमा पाँचौं पटक हुँदैछ ।
