काठमाडौं । विश्वकप क्रिकेट प्रतियोगितामा पाकिस्तानमाथि भारतले सहज जित हात पारेको छ । आइतबार बेलुका भएको खेलमा भारतले पाकिस्तानलाई डक अफ लुइस मेथडका आधारमा ८९ रनले पराजित गरेको हो ।
भारतले दिएको ३३७ रनको विशाल लक्ष्य पछ्याएको पाकिस्तानले ३५ ओभरमा ६ विकेट गुमाएर १६६ रन बनाएर खेलिरहेको अवस्थामा पानी पर्न सुरु भएको थियो । केही समयपछि खेल पुनः सुचारु भयो । ४० ओभरमा झारिएको खेलमा पाकिस्तानले डकवर्थ एन्ड लेविस नियमका आधारमा ३०२ रनको नयाँ लक्ष्य पाएको थियो । जसमा २१२ रन मात्र बनाउन सक्यो ।
पाकिस्तानका लागि प्रारम्भिक ब्याट्सम्यान फाखर जामनले ६२ रन बनाए । यसैगरी बाबर आजमले ४८, इमाद वासिमले अविजित ४६, सदाव खानले २० र कप्तान सरफराज अहमदले १२ रन बनाए । भारतका कुलदीप यादव, हार्दिक पाण्ड्या र विजय शंकरले २/२ विकेट हात पारे ।
यसअघि ओल्ड ट्राफोर्डमा टस हारेर पहिले ब्याटिङ गरेको भारतले वर्षाले प्रभावित खेलमा निर्धारित ५० ओभरमा ५ विकेट गुमाएर ३३६ रन बनाएको छ । भारतको पारीमा ४६.४ ओभरमा पानीले खेल रोकिएको थियो तर, वर्षा रोकिएपछि ओभर घटाइएन, भारत नै ब्याटिङमा आयो । भारतको सुरुवात राम्रो रहृयो । रोहित शर्मा र केएल राहुलले पहिलो विकेटका लागि १३६ रनको साझेदारी गरे । शर्माले १४० रन बनाए । जारी विश्वकपमा रोहितको दोस्रो शतक हो । यसअघि उनले दक्षिण अफ्रिकाविरुद्धको खेलमा पनि शतक प्रहार गरेका थिए । उनले उक्त खेलमा १२२ रन बनाएका थिए । यससँगै रोहितले एकदिवसीय क्रिकेटमा आफ्नो शतक संख्या २३ पु¥याएका छन् ।
कप्तान विराट कोहलीले ७७ रन बनाए ।उनी एकदिवसीय क्रिकेटमा सबैभन्दा छिटो ११ हजार रन बनाउने खेलाडी पनि बनेका छन् । उनले २३० खेलको २२२ पालीबाट यो कोसेढुंगा बनाएका हुन् । यसअघि यो कीर्तिमान सचिन तेन्दुल्करको नाममा थियो । उनले २७६ पालीमा ११ हजार रन पूरा गरेका थिए ।
यसैगरी भारतका लोकेश राहुलले ५७, हार्दिक पाण्ड्याले २६ र विजय शंकरले १५ रन बनाए ।
राहुल ५७ रनमा आउट भए । पाकिस्तानका मोहम्मद आमिरले ३ विकेट हात पारे ।
