काठमाडौं । विश्वकप क्रिकेटमा आयोजक इंग्ल्यान्डले अफगानिस्तानलाई १५० रनको फराकिलो अन्तरले पराजित गरेको छ । यो जारी विश्वकपमा कुनै पनि टिमको सबैभन्दा ठूलो जित हो ।
३९८ रनको विशाल लक्ष्य पछ्याउँदै ब्याटिङ थालेको अफगानिस्तानले निर्धारित ५० ओभरमा आठ विकेटको क्षतिमा २४७ रन मात्रै बनाउन सक्यो । अफगानिस्तानका लागि हस्मतउल्लाह शाहिदीले ७६, राहमत शाहले ४६, अस्घर अफगानले ४४ र गुल्बादिन नाइबले ३७ रन बनाए । बलिङतर्फ जोफ्रा आर्चर र आदिल रशिदले समान ३-३ विकेट लिए ।
यसअधि टस जितेर पहिले ब्याटिङ गरेको इङल्याण्डले अफगानिस्तानलाई ३९८ रनको विशाल लक्ष्य दिएको थियो । इङल्याण्डले ५० ओभरमा ६ विकेट गुमाएर ३९७ रन बनायो ।इङल्याण्डका लागि कप्तान इयोन मोर्गनले सर्वाधिक १४८ रनको पारी खेलेका थिए । मोर्गनले सुरु देखि नै आक्रामक ब्याटिंग गर्दै केवल ७१ बलमा १४८ रन बनाएर आउट भएका हुन् । मोर्गनले आफ्नो पारीमा १७ छक्का र केवल ४ चौका प्रहार गरेका थिए । ३६ बलमा अर्धशतक पुरा गरेका मोर्गनले ५७ बलमा शतक पुरा गरेका थिए । उनले तेस्रो विकेटका लागि जोय रुटसँग मिलेर १८९ रनको साझेदारी गरेका थिए ।
इङल्याण्डका लागि ओपनर जोनी बैरस्ट्रवले ९० रन बनाएर आउट भएका थिए । त्यस्तै जोय रुटले लगातार उत्कृष्ट ब्याटिंग गर्दै यस खेलमा ८८ रन बनाएर आउट भएका थिए ।
त्यस्तै जोस बटलर २ रन बनाएर आउट भए भने बेन स्टोकले २ र मोइन अलीले अविजित १९ बलमा ३१ रन बनाएका थिए । अफगानिस्तानका लागि गुलबदीन नैब र दावलत जर्दानले ३–३ विकेट लिए । तीन स्पिनर खेलाएको अफगानिस्तानका स्पिनरलाई इङल्याण्डका ब्याट्सम्यानले धुलाई गरेका थिए । राशिद खानले ९ ओभरमा ११० रन दिएर कुनै विकेट लिएनन् भने मोहमद नावीले ९ ओभरमा ७० रन दिदा कुनै विकेट लिन सकेनन् । त्यस्तै अर्का स्पिनर मुजीब उर रहमानले भने किफायती बलिङ गर्दै १० ओभरमा ४४ रन दिए पनि विकेट भने लिन सकेनन् ।
यस्ता बने रेकर्ड
मोर्गन र रुटको कीर्तिमानी पार्टनरसिप
उच्च रन बनाउन कप्तान मोर्गन र रुटले १८९ रनको साझेदारी गरे । यो विश्वकपको इतिहासमा इंग्ल्याण्डको सबैभन्दा ठूलो पार्टनरसिपको रेकर्ड हो । अघिल्लो रेकर्ड डी एमिस र फ्लेचरको नाममा थियो । उनीहरुले सन् १९७५ मा आयोजना भएको विश्वकपमा भारतविरुद्ध १७६ रनको पार्टनरसिप गरेका थिए ।
साथै मोर्गनले एकदिवसीय क्रिकेटको एक पारीमा सर्वाधिक छक्का प्रहार गर्ने खेलाडीको रेकर्ड कायम गरेका छन् । उलने सर्वाधिक १७ छक्का प्रहार गर्दै विश्व रेकर्ड समेत बनाएका छन् । यसअघि क्रिस गेलको एक पारीमा सर्वाधिक १६ छक्काको रेकर्ड थियो ।
राशिद बने सबैभन्दा महंगा बलर
बलिङतर्फ अफगानिस्तानका राशिद खान असफल भए । उनले ९ ओभर बलिङ गर्दै ११० रन खर्चिए । विश्वकप क्रिकेटको ४४ वर्षे इतिहासमा यो सबैभन्दा महंगो बलिङ हो । यसअघि यस्तो अनौठो रेकर्ड न्युजिल्याण्डका मार्टिन स्नेडनको नाममा थियो । उनले सन् १९८३ मा इंग्ल्याण्डविरुद्ध १२ ओभरको स्पेलमा १०५ रन खर्चिएका थिए ।
