काठमाडौं । कोपा अमेरिका–२०१९ को दोस्रो क्वाटरफाइनल खेलमा आज अर्जेन्टिनाले भेनेजुएलाविरुद्ध खेल्ने भएको छ ।
नेपाली समयअनुसार शनिबार बिहान १२ः४५ बजेबाट सुरु हुने खेलमा समूह ‘बी’को उपविजेता बनेर क्वार्टरफाइनलमा प्रवेश गरेको अर्जेन्टिना सेमिफाइनलमा आफ्नो भेट ब्राजिलसँग पक्का गर्न दाउमा रहनेछ । यता समूह ‘ए’को उपविजेता बनेर क्वार्टरफाइनलमा प्रवेश गरेको भेनेजुएला अर्जेन्टिनालाई पराजित गरि आफ्नो जित दर्ता गर्ने दाउमा रहेको छ ।
यता अर्जेन्टिना गत मार्चमा भएको मैत्रीपूर्णा खेलमा भेनेजुएलासँग ३–१ले पराजित भएको थियो । त्यसयता दुई टिम अफिसियल प्रतियोगितामा भिड्न लागेको हुनाले अर्जेन्टिना भेनेजुएलासँग उक्त हारको बदला लिने दाउमा हुनेछ ।
यता आज बिहान भएको खेलमा आयोजक ब्राजिल कोपा अमेरिका कपको सेमिफाइनलमा प्रवेश गरेको छ ।पहिलो क्वाटरफाइनलको खेलमा ब्राजिलले पाराग्वेलाई पेनाल्टी सुटआउटमा ४–३ ले पराजित गर्दै अन्तिम चारमा स्थान पक्का गरेको हो ।
पेनाल्टी सुटआउटमा ब्राजिलका लागि विलियन, मार्किनोस, फिलिप काउटिन्हो र गाब्रियल जेससले गोल गरेका थिए। चौथो नम्बरमा पेनाल्टी प्रहार गर्न आएका रोबर्टो फिर्मिनोको प्रहार भने आउट भएको थियो।
पाराग्वेका लागि अल्मिरोन, भाल्डेज र जुवान रोद्रिगो रोजासले गोल गरे। तर पहिलो नम्बरमा पेनाल्टि हान्न आएका गुस्ताफो गोमेजको प्रहारलाई ब्राजिलका गोलकिपर एलिन्सनले रोकेका थिए। यस्तै पाँचौ नम्बरमा पेनाल्टी हानेका डेर्लिस गोन्जालेजको प्रहार आकासियो।
त्यसअघि ५८ औं मिनेटमा फाबियल भल्बुएनाले रातो कार्ड पाएपछि पाराग्वे दश खेलाडीमा झरेको थियो । एक खेलाडी कम भएको अवस्थामा पनि ब्राजिलले पाराग्वे विरुद्ध गोल गर्न सकेन । निर्धारित ९० मिनेटको खेलमा दुवै टिमबाट गोल हुन नसकेपछि खेल सिधै पेनाल्टी सुटआउटमा पुगेको हो ।
प्रतियोगिताअन्तर्गत शनिबार सवेर विहान पौने पाँच बजे कोलम्बिया र चिली भिड्नेछन्।
