एजेन्सी । स्पेनिस फुटबल लिग ला लिगा अन्तर्गत बार्सिलोनाले सानदार जित निकालेको छ ।
आइतबार मध्यरातमा भएको खेलमा बार्सिलोनाले चीर प्रतिद्वन्द्वी रियल मड्रिडलाई ४-० गोलले पराजित गरेको हो ।
रियलको घरेलु मैदान सान्टियागो बर्नबेउमा भएको एल क्लासिकोमा बार्सिलोनालाई जित दिलाउन पिएरे एम्रिक अउबामेयाङले २ गोल गरे भने रोनाल्ड आरुजोले र फेरान टोरेसले एक एक गोल गरे ।
खेलको २९ औं मिनेटमा अउबामेयाङले गोल गर्दै बार्सिलोनालाई सुरुवाती अग्रता दिलाएका थिए । ३८ औं मिनेटमा आरुजोले गोल गर्दै बार्साको अग्रता दोब्बर पारे ।
यस्तै, दोस्रो हाफ सुरु भएलगत्तै अर्थात् ४७ औं मिनेटमा फेरान टोरेसले गोल गर्दै बार्सिलोनाको अग्रता ३-० को बनाए । ५१ औं मिनेटमा अउबामेयाङले व्यक्तिगत दोस्रो तथा टिमका लागि चौंथो गोल गर्दै बार्सिलोनालाई सानदार जित दिलाए ।
जितसँगै बार्सिलोना २८ खेलबाट ५४ अंकसहित तालिकाको तेस्रो स्थानमा रहेको छ । यता पराजित रियल भने २९ खेलबाट ६६ अंकसहित शीर्षस्थानमा कायम छ ।
